ٹنڈوالہ یار:(دنیا نیوز) اندرون سندھ ٹنڈوالہ یار کی نصیر کینال میں کار گرنے سے چار دوست جاں بحق ہوگئے۔
میرپورخاص کے سینئر سپرنٹنڈنٹ آف پولیس (ایس ایس پی) سلیم شاہ نے میڈیا کو بتایا کہ چاروں افراد کراچی سے ایک کار میں سفر کر رہے تھے کہ تیز رفتاری کی وجہ سے ان کی کار نہر میں گر گئی۔
ایس ایس پی نے بتایا کہ جاں بحق ہونے والوں کی شناخت 23 سالہ عبدالاحد شیخ ولد محمد اسلم شیخ ،21 سالہ سمیر ولد رضوان الدین صدیقی، 26 سالہ علی شان ولد محمد اقبال اور 20 سالہ عدیل ولد محمد اعظم فاروقی کے طور پر ہوئی ہے، لاشوں کو نکالنے کے بعد گزشتہ رات ہی کراچی منتقل کر دیا گیا تھا۔
ٹندوالہ یار پولیس کے ترجمان امین گل اوڈھ نے بتایا کہ عبدالاحد میرپورخاص کا رہائشی تھا اور کراچی منتقل ہو گیا تھا، وہ اپنے کزن اسفند لغاری سے میرپورخاص میں کرائے کی کار میں اپنے دوستوں کے ساتھ ملنے آ رہا تھا۔
امین گل اوڈھ نے مزید بتایا کہ علی شان سیالکوٹ پنجاب کا رہائشی تھا لیکن کراچی میں مقیم تھا، یہ تمام دوست کراچی میں ایک ہی علاقے میں رہائش پذیر تھے۔
مقامی لوگوں نے پولیس کو بتایا کہ سمیر اور عدیل بھی میرپورخاص سیٹلائٹ ٹاؤن کے رہائشی تھے لیکن ان کے خاندان کراچی منتقل ہو گئے تھے، مرنے سے قبل انہوں نے اپنی ویڈیو بھی سوشل میڈیا پر شیئر کی تھی۔
حادثے کے فوری بعد مقامی غوطہ خور انہیں بچانے کے لیے نہر میں کود گئے تھے مگر چاروں دوست اس وقت تک جاں بحق ہوچکے تھے۔
