مری : (دنیا نیوز) طویل وقفے کے بعد برفباری سے ملکہ کوہسار مری نے سفید چادر اوڑھ لی۔
ضلعی انتظامیہ کے مطابق مری کے اونچے پہاڑوں پر اب تک 5 انچ تک برف پڑھ چکی ہے جبکہ نشیبی علاقوں میں بعض مقامات پر بارش کا سلسلہ جاری ہے ۔
مری کی ضلعی انتظامیہ کی جانب سے تمام متعلقہ اداروں کو ہائی الرٹ کر د یا گیا ، تمام شاہراہوں سے برف صفائی کا عمل بھی جاری ہے جس سے ٹریفک رواں دواں ہے، ضلعی انتظامیہ کی جانب سے قائم کردہ 13 سہولت سنٹرز پر ریسکیو اہلکار ایمرجنسی ریسورسز کے ہمراہ موجود ہیں۔
مری میں برفباری پر ڈپٹی کمشنر ضلع مری آغاظہیر عباس شیراز ی کی طرف سے ٹریفک ایڈوائزری جاری کر دی گئی ہے جس میں ہدایت کی گئی ہے کہ شہری احتیاط کریں اور غیر ضروری سفر سے گریز کریں ، سیاح مری میں دوران برفباری مکمل فٹ اور فور ویل گاڑی لے کر آئیں ۔
انتظامیہ کی جانب سے مزید کہا گیا ہے کہ دوران برفباری اپنی گاڑی کا فیول ٹینک فل کر کے آئیں ، دوران برفباری گاڑی سلپ ہونے کی صورت میں گاڑی کے ٹائر پر چین کا استعمال کریں ، دوران برفباری روڈ کے اوپر گاڑی کھڑی کر کے سلفی نہ بنائیں ، ٹریفک وارڈنز کی ہدایات پر عمل کریں ۔
