پنڈی گھیپ: (دنیا نیوز) گورنر پنجاب سردار سلیم حیدر خان نے کہا ہے کہ وزیر اعظم شپ بلاول بھٹو کے قریب ہے، سال دو سال میں بلاول بھٹو وزیر اعظم بن جائیں گے۔
پنڈی گھیپ میں عوامی اجتماع سے خطاب کرتے ہوئے سردار سلیم حیدر خان کا کہنا تھا کہ پیپلز پارٹی سے بہتر کوئی جماعت نہیں، دوسری جماعتوں کی لیڈر شپ میں وزراء سمیت اراکین اسمبلی سے ہاتھ ملاتے وقت فرعونیت کی جھلک نظر آتی ہے۔
انہوں نے کہا کہ جہاں عوام کے حقوق اور ایشوز کی بات ہوگی، عوام کے ساتھ کھڑا ہوں اور کھڑا رہوں گا۔
ان کا کہنا تھا کہ دہشت گردی کیخلاف جنگ میں پوری قوم پاک فوج کے ساتھ کھڑی ہے، پاک فوج اور دیگر سکیورٹی فورسز دہشت گردی کے خلاف شہادتیں دے رہیں ہیں، پیپلزپارٹی اور پاکستانی عوام انہیں خراج تحسین پیش کرتی ہے، کل، آج اور آنے والے وقت میں اپنے اداروں کے ساتھ کھڑا ہوں۔
گورنر پنجاب نے کہا کہ ہر طرف سے یہی کوشش ہے کہ پاکستان واحد ایٹمی پاور ہے اسے ختم ہونا چاہئے اگر یہ قائم ہے تو پاکستان کی مضبوط فوج کی وجہ سے ہے۔
سردار سلیم حیدر کا مزید کہنا تھا کہ دو چار سڑکیں اور فنڈ کی منتیں کرنے کا عادی نہیں، جب بلاول بھٹو وزیر اعظم بنیں گے تب زیادہ فنڈز اٹک میں استعمال کریں گے، اٹک کے عوام ترقیاتی کاموں سے محروم ہیں، اٹک کے جوانوں نے فوج میں شامل ہو کر ملک کی خدمت کی اور اپنی جانوں کا نذرانہ پیش کیا ہے۔
