اسلام آباد: (دنیا نیوز) محکمہ موسمیات کےمطابق آئندہ 24 گھنٹے کے دوران ملک کے بیشتر علاقوں میں موسم سرد اور خشک جبکہ پہاڑی علاقوں میں صبح اوررات کے اوقات میں شدید سرد رہنے کا امکان ہے۔
محکمہ موسمیات کے مطابق بالائی سندھ اور پنجاب کے چند میدانی علا قوں میں صبح اور رات کے اوقات میں سموگ، دُھند چھائے رہنے کی توقع ہے، اسلام آباد، خطہ پوٹھوہار، خیبرپختونخوا میں چند مقامات پر صبح کے اوقات میں کہرا پڑنے کی توقع ہے۔
منگل کے روز ملک کے بیشتر علاقوں میں موسم سرد اور خشک جبکہ پہاڑی علاقوں میں شدید سرد رہا، تاہم مری، گلیات اور گرد و نواح میں چند مقامات بوندا باندی، ہلکی برفباری ہوئی۔
رپورٹ کے مطابق پنجاب، بالائی سندھ اور خیبر پختونخوا کے میدانی علاقوں میں چند مقامات پر سموگ، دُھند چھائی رہی۔
محکمہ موسمیات کے مطابق لہہ اور سکردو منفی 9، استور، گلگت، گوپس منفی7، کوئٹہ منفی 6، ہنزہ، قلات منفی 5، دیر اورکالام میں منفی 4 ڈگری سینٹی گریڈ ریکارڈ کیا گیا۔
