اسلام آباد: (دنیا نیوز) وفاقی وزارت داخلہ نے چیف سیکرٹری خیبرپختونخوا کو پی ٹی آئی کے 24 نومبر کے احتجاج کے دوران سرکاری وسائل کا استعمال روکنے کی ہدایت کردی۔
وفاقی وزارت داخلہ نے چیف سیکرٹری خیبرپختونخوا کو خط لکھ دیا، چیف سیکر ٹری خیبرپختونخوا کو خط وزارت داخلہ کے سیکشن افسر کی جانب سے لکھا گیا ہے۔
وفاقی وزارت داخلہ کی جانب سے چیف سیکرٹری خیبر پختونخوا کو لکھے گئے مراسلہ میں کہا گیا ہے کہ یقینی بنایا جائے 24 نومبر کے احتجاج میں سرکاری مشینری استعمال نہ ہو، یقینی بنایا جائے احتجاج میں سرکاری مشینری، سرکاری ملازمین کی شمولیت یا پیسہ استعمال نہیں ہو گا۔
خیال رہے کہ پاکستان تحریک انصاف کی جانب سے 24 نومبر کو احتجاج کی کال دی گئی ہے جسے فائنل کال کہا جارہا ہے، تحریک انصاف اسلام آباد میں احتجاج کی تیاریوں میں مصروف ہے جبکہ حکومت کی جانب سے اسلام آباد میں احتجاج روکنے کیلئے تیاریوں کا سلسلہ بھی جاری ہے۔
دوسری جانب تحریک انصاف کے احتجاجی مظاہرین کو ٹف ٹائم دینے کیلئے حکومت نے بھی حکمت عملی بنانا شروع کردی۔
ذرائع محکمہ داخلہ کے مطابق پنجاب کے مختلف اضلاع کی سکیورٹی رینجرز کے سپرد کیے جانے کا امکان ہے، صوبہ کے مختلف اضلاع میں امن و امان کی صورتحال کو کنٹرول کرنے کے لیے رینجرز تعینات کی جائے گی۔
حکومتی ذرائع کا بتانا ہے کہ احتجاج کو ناکام بنانے کیلئے موبائل انٹرنیٹ سروس بھی معطل کیے جانے کا امکان ہے، پنجاب حکومت رینجرز اور موبائل انٹرنیٹ کے لیے وفاق کو خط لکھے گی، حتمی فیصلہ کیبنٹ کمیٹی برائے لا اینڈ آرڈر کے اجلاس میں کیا جائے گا۔
