نارووال: (دنیا نیوز) مسلم لیگ ن کے رہنما و سابق وفاقی وزیر احسن اقبال نے کہا کہ حکومت سازی ایک چیلنج ہے، قوم نے تقسیم مینڈیٹ دیا ہے، حالات کا تقاضا تھا ایک مستحکم مینڈیٹ دیا جاتا۔
میڈیا سے گفتگو کرتے ہوئے احسن اقبال نے کہا کہ جن کو مینڈیٹ ملا ہے ان کی ذمہ داری ہے کہ ملک کے مفاد حکومت سازی کے عمل کو اچھی طرح سے پایہ تکمیل تک پہنچائیں، انتشار کی سیاست سے آگے بڑھیں گے تو ملک کا نقصان ہو گا۔
انہوں نے کہا کہ جو بھی حکومت آئے گی اس کو آئی ایم ایف کے ساتھ نیا معاہدہ کرنا ہو گا، محاذ آرائی کی سیاست ہوگی تو ملک کا نقصان ہو گا، زرداری کے اسلام آباد پہنچنے پر کوئی اعتراض نہیں ہے، پاکستان کا دارالحکومت ہے ہر کوئی آتا جاتا ہے۔
احسن اقبال نے کہا کہ خرید و فروخت ہارس ٹریڈنگ والی بات نہیں، آزاد امیدواروں کی اپنی صوابدید ہے کس جماعت میں شامل ہونا چاہتے ہیں۔
سابق وفاقی وزیر نے کہا کہ ن لیگ سب سے بڑی سیاسی جماعت بن کر ابھری ہے، آزاد امیدوار بھی بڑی سیاسی جماعت کے ساتھ آئیں گے، پنجاب میں ہماری حکومت قائم ہو گی۔
