گوجرانوالہ: (دنیا نیوز) مسلم لیگ ن کے سینئر رہنما عطا اللہ تارڑ نے کہا کہ جب ہمارے لیڈر کے قدم اس پاک دھرتی پر پڑیں گے اس دن ملک کی تقدیر بدلے گی۔
مسلم لیگ ن کے سینئر رہنما رانا مشہود اور ڈپٹی سیکرٹری جنرل عطااللہ تارڑ نے گکھڑ میں جلسہ عام سے خطاب کیا، عطا اللہ تارڑ نے کہا کہ میرے حلقے کے عوام اپنے قائد کا والہانہ استقبال کر کے ثابت کریں گے کہ گوجرانوالہ مسلم لیگ ن کا قلعہ ہے، میرے حلقے کے عوام نے ہمیشہ مسلم لیگ ن کو یہاں سے جتوا کر ثابت کیا ہے کہ یہ لوگ میاں نواز شریف سے کتنی محبت کرتے ہیں۔
— PMLN (@pmln_org) October 15, 2023
عطااللہ تارڑ نے کہا کہ عوام کا جوش و خروش دیکھ کر میرا دل خوشی سے باغ باغ ہے، ایک یونین کونسل لیول پر اتنے بڑے جلسہ عام کا انعقاد کر کے آپ نے ثابت کر دیا ہے کہ 21 اکتوبر کو میرے حلقے کے لاکھوں لوگ میاں نوازشریف کا استقبال کرنے لاہور جائیں گے۔
مسلم لیگ ن کے ڈپٹی سیکرٹری جنرل نے مزید کہا کہ آپ لوگ میاں نوازشریف سے محبت کرتے ہیں تو میاں نوازشریف نے بھی اپنے تمام ادوار حکومت میں اس علاقے کی تعمیر و ترقی پر خصوصی توجہ دی، گکھڑ مسلم لیگ ن کا گڑھ ہے اور یہاں کے عوام بے تابی سے میاں نواز شریف کی راہ دیکھ رہے ہیں۔
عطا اللہ تارڑ نے مزید کہا کہ اس بار پھر میاں محمد نوازشریف پاکستان کو معاشی دلدل سے نکال کر ترقی کی راہ پر گامزن کرنے آرہا ہے، اس بار پھر لوگوں کی تقدیر سنوارنے کا فرض ہمارا قائد ادا کرے گا، اس بار ہمارا قائد مہنگائی کے خاتمے اور معیشت کو سنبھالنے آ رہا ہے، نوازشریف ہماری قوم کی آخری امید ہے، ہمارے قائد کا استقبال تاریخی ہوگا۔
