لاہور: (دنیا نیوز) مسلم لیگ (ن) کا اہم اجلاس ہوا جس میں وزیر اعظم شہباز شریف، مسلم لیگ (ن) کے قائد میاں نواز شریف ویڈیو لنک پر اور دیگر سینئر رہنما بھی شریک ہوئے، اجلاس میں ملک کی معاشی، پنجاب کی سیاسی، پارٹی و دیگر اہم امور پر تبادلہ خیال کیا گیا۔
اس موقع پر گفتگو کرتے ہوئے سابق وزیر اعظم نواز شریف نے کہا کہ مذاکرات ملک و قوم کیلئے ہیں لیکن دوسری طرف ذاتی مفادات، ملک اور اداروں کو بدنام کرنے کی جنگ ہے، جنہوں نے ملک کو ساڑھے تین سال نقصان پہنچایا ان کی گارنٹی دینے والا کوئی نہیں۔
نواز شریف نے مزید کہا کہ ہمیں فوری طور پر عوام کے مسائل حل کرنے اور مہنگائی کو کم کرنے کیلئے فوری اقدامات کرنا ہوں گے، انتخابات سے قبل عوامی ریلیف کیلئے پالیسیاں بنائی جائیں، پاکستان کی تمام سیاسی جماعتوں کو چاہیے کہ ملک و قوم کیلئے اپنا کردار ادا کریں۔
یہ بھی پڑھیں: عدلیہ آئین و قانون کے مطابق فیصلے کرتی ہے، پنچایت نہیں لگاتی: خواجہ آصف
انہوں نے کہا ہم نے دن رات محنت کر کے ملک کو ترقی کی راہ پر گامزن کیا جسے ساڑھے 3 سال میں ملک دشمنوں نے تباہ کر دیا، عوام ان کو کبھی معاف نہیں کریں گے، کچھ ایسے لوگوں کو ترقی ہضم نہیں ہوتی، عوام کو ایسے افراد سے بچنا ہوگا اور ہمیں صرف ملک و قوم کا سوچنا ہوگا۔
وزیر اعظم شہباز شریف نے اجلاس میں گفتگو کرتے ہوئے کہا کہ عوام کو بہت جلد ریلیف بارے خوشخبری دیں گے، ریلیف پیکیج سے عوامی مشکلات کم ہوں گی، ایک ہی دن انتخابات کی تاریخ اور دیگر معاملات سے متعلق اتحادیوں سے ملکر فیصلہ کیا جائے گا، ایک سال ہو گیا ملک کی بہتری و ترقی کیلئے اتحادیوں کے ساتھ مل کر محنت کر رہے ہیں۔
