اسلام آباد: (ویب ڈیسک) امریکا نے اپنے محکمہ زراعت کے تحت پاکستانی کسانوں کے لئے کھاد کے باکفایت، موثر استعمال اور افادیت کو مضبوط بنانے اور دیگر اقدامات کے لئے 4.5 ملین ڈالر کے امدادی پروگرام کا اعلان کیا ہے۔
اس تعاون کے سلسلہ میں وفاقی وزیر برائے موسمیاتی تبدیلی سینیٹر شیری رحمان اور امریکی محکمہ خارجہ کی اسسٹنٹ سیکرٹری برائے بیورو آف اوشینز اینڈ انٹرنیشنل انوائرمنٹل اینڈ سائنٹفک افیئرز مونیکا میڈینا نے اپنے اپنے ملک کی قیادت کی۔
دونوں رہنماؤں کی جانب سے جاری مشترکہ بیان میں کہا گیا ہے کہ حکام اور ماہرین موسمیاتی اور ماحولیاتی مسائل بشمول موسمیاتی تبدیلی، توانائی کی منتقلی، آبپاشی انتظام، موسمیاتی سمارٹ ایگریکلچر، ہوا کے معیار، حیاتیاتی تنوع اور پلاسٹک کی ری سائیکلنگ سمیت فضلہ کے انتظام پر تعاون کے سلسلہ میں مصروف عمل رہے۔
دونوں ممالک کے رہنماؤں نے 2022 میں پاکستان میں تباہ کن سیلاب کے اثرات پر تبادلہ خیال کیا اور موسمیاتی تبدیلی کے اثرات سے لچک پیدا کرنے کی اہمیت پر زور دیا، امریکا نے دریائے سندھ کے طاس کی ماحولیاتی صحت کو بحال کرنے کے لیے پاکستان کے "لیونگ انڈس" اقدام کی حمایت کا اظہار کیا۔
یہ بھی پڑھیں: عمران خان کارکنان، پولیس والوں کی زندگیاں خطرے میں ڈال رہے ہیں، شیری رحمان
موسمیاتی تبدیلیوں کی تخفیف اور موافقت پر دونوں حکومتوں نے تعاون کے ذریعے موسمیاتی بحران سے نمٹنے کے عزم کا اعادہ کیا، دونوں حکومتوں نے امریکا پاکستان "گرین الائنس" کے فریم ورک کے ذریعے اپنی دوطرفہ شراکت داری کو مزید گہرا کرنے کا عزم کیا اور کہا کہ "گرین الائنس" دونوں ممالک کو آب و ہوا، ماحولیاتی اور اقتصادی امورخاص طور پر زراعت، پانی اور صاف توانائی پر شراکت داری کے ذریعے مشترکہ طور پر نمٹنے کے لئے موجودہ اور مستقبل کی ضروریات کو پورا کرنے میں معاون ہو گا۔
— VicePresidentPPPP (@VicePresPPPP) March 16, 2023
امریکا نے پاکستان میں نئے پروگراموں کا اعلان کیا، جن میں پاکستانی کسانوں کے لیے کھاد کے باکفایت استعمال اور تاثیر کو مضبوط بنانے کا پروگرام بھی شامل ہے، امریکی ادارہ برائے بین الاقوامی ترقی (یو ایس ایڈ) نے پاکستان میں موسمیاتی سمارٹ زراعت اور موسمیاتی فنانس کو فروغ دینے کے لیے نئی سرگرمیوں کا اعلان کیا۔
یو ایس آرمی کور آف انجینئرز پاکستان کی سیلاب کی پیش گوئی اور آفات سے نمٹنے کی صلاحیتوں کو مضبوط بنانے کے لیے وزارت موسمیاتی تبدیلی اور دیگر مقامی اسٹیک ہولڈرز کے ساتھ برف پگھلنے سے متعلق موسمی اعداد و شمار کا اشتراک شروع کرے گا۔
یہ بھی پڑھیں: معاشی مسائل کے تناظر میں خواتین کو بااختیار بنانے پر توجہ دی جائے، شازیہ مری
پاکستان نے امریکا کو اپنی نئی قومی صاف فضائی پالیسی کی منظوری کے بارے میں آگاہ کیا اور پلاسٹک کے حوالے سے اپنے حالیہ فضلہ کے انتظام کے اقدامات کی وضاحت کی، دونوں فریقوں نے گرین کلائمیٹ فنڈ بورڈ کے 2023 شریک چیئرز کے طور پر ایک کامیاب سال میں تعاون کرنے کا بھی عہد کیا۔
