اسلام آباد: (دنیا نیوز) پاکستان پیپلز پارٹی کے چیئر مین بلاول بھٹو کی جانب سے او آئی سی اجلاس سے متعلق دی گئی دھمکی کے بعد وفاقی وزیر خارجہ شاہ محمود قریشی نے کہا ہے کہ امید ہے وہ بھارتی آلہ کار نہیں بنیں گے اور اجلاس کو سبوتاژ نہیں کریں گے۔
نجی ٹی وی سے گفتگو کرتے ہوئے شاہ محمود نے کہا کہ بلاول نے نہایت ناسمجھی والا اور بوکھلاہٹ والا بیان دیا ہے، ان کے نمبرز پورے ہیں تو انہیں پُراعتماد اور پریشان تو ہمیں ہونا چاہیے تھا، لیکن پریشان ان کے چہرے ہیں۔ ہم نے عدم اعتماد کا مقابلہ سیاسی و جمہوری انداز میں کرنا ہے، ہم ہرگز تصادم نہیں چاہتے اور کسی رکن اسمبلی کے رستے میں رکاوٹ نہیں بنیں گے، ہر رکن اسمبلی کو اپنے ضمیر کے مطابق ووٹ دینے کا حق ہے، ہم اپنے منحرف ارکان کو منانے کی کوشش کریں گے لیکن زبردستی نہیں کریں گے، ہم تماشا نہیں بنانا چاہتے۔
وزیر خارجہ کا کہنا تھا کہ عدم اعتماد تو ابھی آرہی ہے، لیکن اوآئی سی اجلاس تو پہلے سے طے تھا، مہمان آنے شروع ہوگئے، وزرائے خارجہ تشریف لارہے ہیں، ایسے میں یہ دھمکی دے رہے ہیں۔ بھارت اس کانفرنس کو سبوتاژ کرنا چاہتا ہے، امید ہے بلاول بھارت کے ایجنڈے کے آلہ کار نہیں بنیں گے، اور اس اجلاس کو سبوتاژ نہیں کریں گے۔
اپنی بات کو جاری رکھتے ہوئے انہوں نے کہا کہ اپنے فیصلے پر نظرثانی کریں، ایک طرف مولانا فضل الرحمان نے او آئی سی اجلاس کے لیے اپنا لانگ مارچ موخر کیا لیکن دوسری طرف یہ دھرنا دینے جارہے ہیں، یہ ناپختگی اور ناسمجھی ہے، ان کے بڑے انہیں سمجھائیں، یہ حکومت کا نہیں بلکہ ریاست اور ملکی ساکھ کا معاملہ ہے۔
او آئی سی کانفرنس ان کا باپ بھی خراب نہیں کرسکتا: شیخ رشید
وفاقی وزیر داخلہ شیخ رشید احمد نے اپوزیشن کو خبردار کرتے ہوئے کہا ہے کہ کہ او آئی سی کانفرنس ان کا باپ بھی خراب نہیں کرسکتا۔
دنیا نیوز سے خصوصی گفتگو کرتے ہوئے وفاقی وزیر داخلہ نے کہا کہ اپوزیشن باتیں کم اورعدم اعتماد میں ہارنے کی تیاری کرے۔ اوآئی سی کانفرنس کی حفاظت، حکومت اور افواج کی ذمہ داری ہے۔ اوآئی سی کانفرنس ان کا باپ بھی خراب نہیں کرسکتا۔ اوآئی سی کو سبوتاژکریں گے تو سارا سسٹم سبوتاژہوجائے گا۔
انہوں نے کہا کہ ہارکی وجہ سے ڈرامہ کرنا چاہتے ہیں۔ بلاول ذہنی پستی کا شکارہیں، اپوزیشن کوپتا چل گیا ہے کہ ان کے بندے نہیں نکل رہے۔یہ عدم اعتماد میں ہاریں گے، یہ ہارنے کی تیاری کریں، اوآئی سی کانفرنس کو سبوتاژ نہ کریں۔
