وزیرستان: (دنیا نیوز) شمالی وزیرستان کےعلاقےسپن وام میں خفیہ اطلاعات پر سکیورٹی فورسز کے آپریشن کے دوران دو دہشتگرد مارے گئے۔
آئی ایس پی آرکے مطابق دہشت گردوں کے ساتھ فائرنگ کے تبادلے میں نائیک نزاکت خان شہید ہو گئے، 32 سالہ شہید سپاہی کا تعلق اٹک سے بتایا گیا ہے۔ آپریشن میں مارے گئے دونوں دہشتگرد کالعدم تحریک طالبان پاکستان کے سرگرم رکن تھے اور سکیورٹی فورسز کے خلاف سنگین نوعیت کی کارروائیوں میں ملوث تھے۔
پاک فوج کے جوان اپنی جانیں ہتھیلی پر رکھے مادر وطن کی حفاظت کے لئے دہشتگردوں کے خلاف برسرپیکار ہیں، گذشتہ ہفتے دہشت گردوں نے مارگٹ مائنزکی حفاظت پر مامور ایف سی اہلکاروں کو نشانہ بنایا تھا جس میں چار جوانوں نے جام شہادت نوش کیا۔ دہشت گردوں نے ایف سی پر حملے کے لیے دیسی ساختہ بارودی سرنگ استعمال کی تھی۔
