اسلام آباد:(ویب ڈیسک ) نیشنل انسٹی ٹیوٹ آف ہیلتھ میں پولیو کے خاتمے کے لیے قائم ریجنل ریفرنس لیبارٹری نے ملک کے 22 اضلاع کے سیوریج نمونوں میں پولیو وائرس کی تصدیق کی ہے۔
نیشنل ایمرجنسی آپریشن سینٹر برائے پولیو کے مطابق21 فروری سے 6 مارچ کے درمیان 22 اضلاع سے اکٹھے کیے گئے 28 ماحولیاتی نمونوں کا گزشتہ ہفتے کے دوران نیشنل انسٹی ٹیوٹ آف ہیلتھ میں پولیو کے خاتمے کے لیے ریجنل ریفرنس لیبارٹری میں ٹیسٹ کیا گیا، ٹیسٹ کیے گئے ماحولیاتی نمونوں میں وائلڈ پولیو وائرس ٹائپ ون کی موجودگی کی تصدیق ہوئی ہے، سندھ کے 12، پنجاب کے 2، خیبرپختونخوا کے 2 اضلاع کے نمونے پولیو پازیٹو تھے۔
اسلام آباد، چمن اور جنوبی وزیرستان کے سیوریج نمونے پولیو پازیٹو آئے اسی طرح لاہور، ڈیرہ غازی خان کے ماحولیاتی نمونوں میں بھی پولیو وائرس پایا گیا ہے، بدین، دادو، حیدر آباد، جیکب آباد سمیت شہید بینظیر آباد، سجاول، قمبر اور سکھر سے حاصل کردہ نمونوں میں بھی پولیو وائرس کی تصدیق ہوئی ہے۔
کراچی کے ضلع ایسٹ، ویسٹ، سینٹرل اور کیماڑی کی سیوریج پولیو پازیٹو ہے تاہم ژوب، سیالکوٹ، ملتان اور رحیم یار خان کے اضلاع سے حاصل کردہ سیوریج کے نمونے پولیو وائرس کے لیے منفی آئے۔
خیال رہے یہ پیشرفت اس وقت سامنے آئی ہے جب پاکستان میں رواں برس پہلے ہی پولیو کے 6 کیسز رپورٹ ہوچکے ہیں، جن میں سندھ سے 4، خیبرپختونخوا اور پنجاب سے ایک ایک کیس رپورٹ ہوا ہے۔
واضح رہے گزشتہ برس کے دوران پولیو کے 74 کیسز ریکارڈ کیے گئے تھے، جن میں سے پنجاب اور اسلام آباد سے ایک ایک جبکہ بلوچستان سے 27، خیبر پختونخوا سے 22 اور سندھ سے 23 پولیو کے کیسز رپورٹ ہوئے تھے۔
