کراچی: (دنیا نیوز) شہر قائد میں کورنگی اور ملیر میں مبینہ پولیس مقابلوں کے دوران زخمی سمیت 4 ملزمان کو گرفتار کر لیا گیا۔
رات گئے کورنگی کے علاقے باغ کورنگی میں مبینہ پولیس مقابلہ ہوا، فائرنگ کے تبادلے کے دوران زخمی سمیت 3 ملزمان گرفتار کر لئے گئے۔
ترجمان پولیس کے مطابق تھانہ عوامی کالونی کی حدود سے گرفتار ملزمان عبد الخالق اور اسد مقابلے کے دوران زخمی ہوئے جنکو طبی امداد کیلئے جناح ہسپتال منتقل کر دیا گیا ہے جبکہ ملزمان کا ساتھی رضوان جائے وقوعہ سے فرار ہوتے ہوئے پکڑا گیا۔
ملزمان کے قبضے سے اسلحہ، گولیاں اور موٹر سائیکل برآمد کر لی گئی ہے، گرفتار ملزمان سٹریٹ کرائم کی وارداتوں میں ملوث پائے گئے ہیں۔
اسکے ساتھ ڈسٹرک ملیر میں تھانہ سٹیل ٹاؤن نے گھگر پھاٹک کے قریب مبینہ پولیس مقابلے کے درمیان ایک ڈاکو زخمی حالت میں گرفتار کر لیا گیا۔
پولیس حکام کے مطابق گرفتار ملزم نوید کو جناح ہسپتال منتقل کر دیا گیا ہے جبکہ ملزم کے قبضے سے برآمد اسلحہ اور گولیاں تحویل میں لے لی گئی ہیں، گرفتار ملزم کے حوالے سے مزید تفتیش جاری ہے۔
