کراچی: (ویب ڈیسک) شہر قائد میں مبینہ پولیس مقابلے کے بعد 5 ڈاکوؤں کو گرفتار کر لیا، ڈاکوؤں کے قبضے سے 5 پستول، گولیاں، چھینی گئی 6 موٹر سائیکلیں، 15 موبائل فون اور نقدی برآمد کرلی۔
پولیس حکام نے بتایا کہ سرجانی ٹاؤن پولیس نے خفیہ ذرائع سے ملنے والی اطلاع پر واحد بخش گبول گوٹھ میں قائم ایک مکان پر چھاپہ مارا تو ملزمان نے پولیس پر فائرنگ شروع کر دی تاہم پولیس نے گلی کا گھیراؤ کرتے ہوئے ڈاکوؤں کو حراست میں لے لیا ان کے دیگر 3 ساتھی موقع سے فرار ہوگئے۔
پولیس ترجمان کے مطابق گرفتار ڈاکوؤں کی شناخت انصار علی عرف سکیورٹی گارڈ عرف پولیس والا (جعلی) ولد امام دین، محمد فیضان عرف شانی عرف بابا ولد صلاح الدین، راشد ولد حاجی ناتھا خان، غلام سرور ولد پیر محمد اور وسیم ولد عبدالرزاق کے نام سے کی گئی۔
ترجمان پولیس کے مطابق گرفتار ڈاکوؤں کا نیٹ ورک کراچی سے بلوچستان تک سرگرم ہے اور گروہ میں شامل دیگر ساتھیوں کی تلاش میں پولیس چھاپے مار رہی ہے، تاہم پولیس نے ڈاکوؤں کے خلاف قانونی کارروائی مکمل کرتے ہوئے مختلف دفعات کے تحت مقدمات درج کرلئے۔
