پشاور : (دنیا نیوز ) کاؤنٹر ٹیررزم ڈیپارٹمنٹ (سی ٹی ڈی ) پشاور ریجن نے دہشتگرد بھتہ خوروں کے خلاف گرینڈ آپریشن میں ایک دہشتگرد ہلاک جبکہ 5 دہشت گردوں کوگرفتار کرلیاگیا ۔
کاؤنٹر ٹیررزم ڈیپارٹمنٹ (سی ٹی ڈی ) نے پشاور کے علاقے ٹیلہ بند کے علاقے سے بھتہ خوری میں ملوث دہشت گردوں کا بڑا نیٹ ورک پکڑ لیا، فائرنگ کے تبادلے میں ایک دہشتگرد ہلاک ہوگیا جبکہ 5 کو گرفتار کرلیا گیا ۔
سی ٹی ڈی حکام کے مطابق دہشتگردوں کے دو سے تین ساتھی موقع سے فرار ہونے میں کامیاب ہوگئے ، دہشتگردوں کا تعلق کالعدم تنظیم سے ہے، بھتہ خوروں سے 2 کلاشنکوف ، 6 دستی بم، 2 پستول اور کارتوس برآمد کیے گئے ہیں ۔
سی ٹی ڈی حکام کے مطابق گرفتار افراد کیخلاف قانونی کارروائی کا آغاز کردیا گیا۔
