کراچی: (دنیا نیوز) کراچی کے نیشنل سٹیڈیم میں چیمپئنز ٹرافی کے آج، 21 فروری اور یکم مارچ کوکھیلے جانے والے میچز کےلیے ٹریفک پلان جاری کردیا گیا۔
میچز کے دوران سر شاہ سلیمان روڈ ٹریفک کے لیے کھلا رہے گا، سٹیڈیم آنے والے شائقین نیشنل کوچنگ سینٹر اور چائنہ گراؤنڈ میں گاڑی پارک کریں گے۔
کار ساز سے آنے والے فلائی اوور کے نیچے سے کوچنگ سینٹر اور چائنہ گراؤنڈ پہنچیں گے، ہیوی ٹریفک سہراب گوٹھ سے نیپا، لیاقت آباد نمبر 10 سے حسن سکوائر جا سکے گی جبکہ پیپلز چورنگی سے آنے والی ہیوی ٹریفک یونیورسٹی روڈ جا سکے گی۔
کارساز سے سٹیڈیم، ملینیم تا نیو ٹاؤن، سٹیڈیم سگنل تا حسن سکوائر ہیوی ٹریفک کے لیے بند ہوگا۔
ڈی آئی جی ٹریفک نے اپیل کی ہے کہ شائقین گاڑیاں اور موٹر سائیکلیں سڑک یا سروس روڈ پر کھڑی نہ کریں، شائقین کرکٹ گاڑیاں مختص مقام پر ہی پارک کریں۔
واضح رہے کہ چیمپئنز ٹرافی کا افتتاحی میچ آج پاکستان اور نیوزی لینڈ کے درمیان کھیلا جائے گا، دونوں ٹیموں کے درمیان میچ دوپہر 2 بجے نیشنل سٹیڈیم کراچی میں شروع ہو گا۔
