لاہور: (دنیا نیوز) پاکستانی شائقین کرکٹ اور صحافیوں کے ویزوں کے اجراء کے معاملے پر انٹرنیشنل کرکٹ کونسل کا پاکستان کرکٹ بورڈ کی شکایات پر ردعمل آگیا۔
ترجمان آئی سی سی نے کہا ہے کہ انڈیا میں جاری ورلڈ کپ کے منتظمین پاکستانی شائقین اور صحافیوں کے ویزوں کیلئے کوشاں ہیں، ویزوں کا اجراء میزبان ملک کی ذمہ داری ہے اور وہ ہمارے مکمل تعاون کے ساتھ اس پر سخت محنت کر رہے ہیں، معاملے کو حل کرنے کی ہر ممکن کوشش کی جا رہی ہے۔
پی سی بی ذرائع کے مطابق شائقین اور صحافیوں کے ویزوں کا اجراء نہ ہونے پر بورڈ کو بہت زیادہ دباؤ کا سامنا کرنا پڑ رہا ہے، ورلڈ کپ میں پاکستانی ٹیم کے افتتاحی میچ کی کوریج کیلئے پاکستانی صحافیوں اور شائقین کو انڈین ویزہ حاصل کرنے کے حوالے سے غیر یقینی صورتحال کا سامنا رہا۔
ذرائع پی سی بی کا کہنا ہے کہ شائقین کی موجودگی نہ صرف سٹیڈیم کی رونق بڑھاتی ہے بلکہ عالمی سطح پر کھیل کی کوریج اور فروغ کا باعث بھی بنتی ہے، بورڈ حکام گزشتہ تین برسوں سے شائقین کرکٹ اور صحافیوں کیلئے ویزہ جاری کرنے سے متعلق آئی سی سی کو اس کی ذمہ داریوں سے آگاہ کرتے رہے ہیں۔
پاکستان کرکٹ بورڈ کے ذرائع کا کہنا ہے کہ پی سی بی حکام نے آئی سی سی کے رکن ممالک کے مابین معاہدے کے حوالے سے بھی بات کی اور تمام متعلقہ حکام کے ساتھ اپنی تشویش کا اظہار بھی کرتے رہے ہیں۔
یاد رہے کہ جمعرات کو ترجمان دفتر خارجہ نے کہا تھا کہ کرکٹ ورلڈ کپ کیلئے پاکستانی شائقین اور صحافیوں کو ویزہ جاری کرنے کے معاملے پر انڈین حکام کے ساتھ رابطے میں ہیں، ہم توقع کرتے ہیں کہ انڈین حکام بھارت میں ورلڈ کپ دیکھنے کے خواہشمند پاکستانی شائقین اور صحافیوں کو فوری ویزا جاری کریں گے۔
