ہریانہ: (ویب ڈیسک) بھارت میں والدہ کی خواہش پر دلہا ہیلی کاپٹر میں دلہن لے کر گھر پہنچ گیا جس کی ویڈیو سوشل میڈیا پر وائرل ہوگئی۔
بھارتی میڈیا رپورٹ کے مطابق انوکھی شادی ہریانہ کے ضلع پنچکولہ کے رائے پور رانی علاقے میں واقعہ دھندر دو گاؤں میں ہوئی جہاں ساحل نامی دلہے نے دلہن کو ہیلی کاپٹر میں گھر لا کر والدہ کا دیرینہ خواب پورا کیا۔
وائرل کلپ میں دولہا، دلہن اور والدہ کو سوار دکھایا گیا ہے جس کی ویڈیو نے لوگوں کے دلوں کو چھو لیا۔
ویڈیو میں دیکھا جاسکتا ہے کہ جب دولہا دلہن کو لینے ہیلی کاپٹر میں پہنچا تو یہ منظر دیکھ کر گاؤں والوں کے حیرت کی انتہا نہیں رہی۔
دولہے نے انکشاف کیا کہ 2012 سے اس کی ماں کا خواب تھا کہ وہ اپنی بہو کا ہیلی کاپٹر کے ذریعے استقبال کریں، اس وقت اس نے کہا کہ وہ ایک کمرے کے گھر میں رہتے تھے لیکن اس کے بعد سے حالات بدل گئے۔
ساحل کی بارات 7 اپریل کو یمنا نگر سے رائے پور رانی تک گئی، صبح 10 بجے ہیلی کاپٹر نے دلہن کو لینے کیلئے اڑان بھری جس میں دھندردو گاؤں میں ایک بڑا ہجوم تھا۔
اس موقع پر سکیورٹی کے سخت انتظامات کئے گئے تھے، پولیس اہلکار، فائر بریگیڈ کی گاڑیاں اور ایمبولینسیں موجود تھیں، ساحل نے فخر سے بتایا کہ اس ہیلی کاپٹر کے خواب کو اپنی ماں کیلئے پورا کرنا ایک خاص لمحہ تھا۔
