نئی دہلی: (ویب ڈیسک) کورونا وائرس کی وبا پھیلنے اور اس سے بچاؤ کے لیے ماسک کو ضروری قرار دیے جانے کے بعد دنیا بھر میں طرح طرح کے ڈیزائن کے ماسک دیکھنے کو مل رہے ہیں لیکن کیا کوئی اس حد تک بھی جا سکتا ہے کہ سونے کا ماسک ہی تیار کروا لے؟
بھارتی ریاست مہاراشٹر کے شہر پُونے میں ایک شخص نے تقریباً تین لاکھ انڈین روپے کا ماسک بنوایا ہے۔
خبر رساں ادارے اے این آئی اور این ڈی ٹی وی کے مطابق شنکر کرادے کا کہنا ہے کہ یہ ایک باریک ماسک ہے جس کے اندر چھوٹے چھوٹے سوراخ ہیں تاکہ سانس آسانی سے لی جا سکے، لیکن مجھے یہ معلوم نہیں ہے کہ اس کا کوئی فائدہ بھی ہے یا نہیں۔
شنکر نامی اس شخص کو سونے کے زیورات پہننے کا شوق ہے اور تصویر میں دیکھا جا سکتا ہے کہ سونے کے ماسک کے علاوہ ان کے ہاتھوں میں سونے کی انگوٹھیاں اور گلے میں سونے کی چینز ہیں۔
Maharashtra: Shankar Kurade, a resident of Pimpri-Chinchwad of Pune district, has got himself a mask made of gold worth Rs 2.89 Lakhs. Says, "It s a thin mask with minute holes so that there s no difficulty in breathing. I m not sure whether this mask will be effective." #COVID19 pic.twitter.com/JrbfI7iwS4
— ANI (@ANI) July 4, 2020
انہیں یہ آئیڈیا سوشل میڈیا پر چاندی کا ماسک پہنے ایک شخص کو دیکھ کر آیا۔
ان کا کہنا تھا کہ میں نے سوشل میڈیا پر ایک ویڈیو دیکھی جس میں کولا پور کے ایک آدمی نے چاندی کا ماسک پہنا ہوا تھا تو میں سوچا کہ سونے کا ماسک بنوایا جائے۔ میں نے سونار سے بات کی جنہوں نے ایک ہفتے کے اندر مجھے یہ ماسک بنا کر دیا۔
شنکر کا مزید کہنا تھا کہ میرے سارے خاندان کو سونا پسند ہے اور اگر انہیں یہ ماسک اچھا لگا تو میں ان کے لیے بھی بنواؤں گا۔ مجھے یہ معلوم تو نہیں کہ یہ ماسک مجھے کورونا سے بچا سکے گا یا نہیں لیکن حکومت کی طرف سے وبا سے بچاؤ کے لیے جاری کی گئی ہدایات پر عمل کرنے سے کورونا سے بچا جا سکتا ہے۔
