نیویارک: (ویب ڈیسک) تھریڈز انتظامیہ کی جانب سے صارفین کیلئے اہم فیچر متعارف کرا دیا گیا ہے جس کے بعد انہیں ایک اور سہولت میسر آگئی۔
میٹا کے سوشل میڈیا پلیٹ فارم تھریڈز میں لوکیشن ٹیگنگ فیچر متعارف کرایا گیا ہے، اس فیچر کے ذریعے آپ اپنی پوسٹس میں کسی لوکیشن کا اضافہ کر سکیں گے، یہ فیچر ابھی محدود صارفین کو دستیاب ہے، رپورٹ کے مطابق یہ فیچر انسٹا گرام کے لوکیشن ٹیگنگ سے ملتا جلتا ہے۔
جس کسی صارف کی جانب سے تھریڈز میں لوکیشن تک رسائی دی جائے گی تو آپ ٹیگ کی گئی لوکیشن کے اردگرد موجود مقامات کی فہرست دیکھ سکیں گے، آپ خود بھی کسی مقام کو سرچ کرسکیں گے۔
کمپنی کے مطابق لوکیشن شیئرنگ کو استعمال کر کے صارفین کو ان کے قریبی مقامات کے پیش نظر رکھ کر زیادہ بہتر مواد دکھایا جائے گا، اس فیچر سے تھریڈز سرچ کو بھی بہتر بنانے میں مدد ملے گی جو ابھی صارفین کی توقعات میں پورا اترنے میں ناکام رہی ہے۔
یہ تبدیلی اس وقت بھی کمپنی کیلئے اہم ثابت ہوگی جب تھریڈز میں اشتہارات کا اضافہ کیا جائے گا۔
میٹا کے بانی مارک زکربرگ نے گزشتہ دنوں کہا تھا کہ کمپنی کی جانب سے تھریڈز کو بہتر بنانے کا سلسلہ جاری رہے گا اور پھر اس پلیٹ فارم میں اشتہارات کا اضافہ کیا جائے گا۔
