کراچی: (دنیا نیوز) صدر مملکت آصف علی زرداری، وزیراعظم شہباز شریف، محسن نقوی اور وزیراعلیٰ پنجاب مریم نواز سمیت دیگر شخصیات نے نور زمان کو انڈر 23 ورلڈ سکواش چیمپئن شپ جیتنے پر مبارکباد پیش کی۔
صدرِ مملکت آصف علی زرداری نے پاکستانی سکواش پلیئر نور زمان کو انڈر 23 ورلڈ اسکواش چیمپئن شپ جیتنے پر مبارکباد پیش کرتے ہوئے کہا کہ نور زمان نے فائنل سمیت پوری چیمپئن شپ میں بہترین کھیل پیش کیا۔
آصف علی زرداری نے کہا کہ نور زمان نے اسکواش کے کھیل میں پاکستان کا نام روشن کیا۔مستقبل میں نُور زمان کی مزید کامیابیوں کیلئے پرامید اور کامیابی کیلئے دعا گو ہیں۔
وزیراعظم محمد شہباز شریف نے انڈر 23 ورلڈ سکواش چیمپئن شپ جیتنے پر پاکستانی کھلاڑی نور زمان کو خراج تحسین پیش کرتے ہوئے پوری قوم کو مبارکباد پیش کی۔
وزیر اعظم کا کہنا تھا کہ نور زمان نے اپنے کھیل سے پاکستان کا نام پوری دنیا میں روشن کیا ۔پوری قوم کو آپ پر فخر ہے، انشاء اللہ ، پاکستان اسکواش کے میدان میں اپنا کھویا ہوا مقام دوبارہ حاصل کرے گا۔
چئیرمین پاکستان کرکٹ بورڈ محسن نقوی نے کہا کہ ویل ڈن نور زمان۔ قوم کو آپ پر فخر ہے انہوں نے نور زمان کو مبارکباد دیتے ہوئے کہا کہ نور زمان نے اپنی محنت سے پاکستان کا نام روشن کیا۔
محسن نقوی نے کہا کہ نور زمان کی فتح پاکستان کی جیت ہے، نور زمان کے کوچز اور والدین کو بھی دلی مبارک باد دیتا ہوں، نور زمان جیسے باصلاحیت نوجوان پاکستان کا قیمتی اثاثہ ہیں۔
مزیدبرآں وزیر اعلی مریم نواز شریف نے بھی پاکستانی کھلاڑی نور زمان کو انڈر 23 ورلڈ سکواش چیمپین شپ جیتنے پر مبارکباد پیش کی، وزیر اعلی مریم نواز شریف نے انڈر 23 ورلڈ سکواش کے چیمپین نور زمان کے لئے نیک خواہشات کا اظہارکیا۔
