کراچی: (دنیا نیوز) وفاقی وزیر مذہبی امور سردار محمد یوسف نے کہا ہے کہ عازمین حج کیلئے رواں برس بہترین سہولیات کا انتظام کیا گیا ہے۔
کراچی میں حاجی کیمپ میں میڈیا سے بات چیت کرتے ہوئے وفاقی وزیر مذہبی امور سردار محمد یوسف کا کہنا تھا کہ میں یہاں عازمین حج کی ٹریننگ کے مراحل دیکھنے آیا ہوں، وزارت کا عملہ یہاں موجود ہے تاکہ انتظامی طور سب عازمین حج کو سمجھا سکیں۔
انہوں نے کہا کہ اس سال سرکاری سکیم کے تحت 89 ہزار عازمین حج کی ادائیگی کریں گے، باقی تیاریاں بھی مکمل ہیں، کوشش ہے کہ کسی کو کوئی مشکلات درپیش نہ ہوں، وزیراعظم نے میری ذمے داری لگائی ہے کہ تمام انتظامات اچھے ہوں۔
ان کا کہنا تھا کہ 2013 سے 2018 تک کا اچھا تجربہ رہا ہے، سب سے سستا اور اچھا انتظام اس وقت کیا گیا تھا، اس وقت دوبارہ ذمے داری عائد کی گئی ہے کہ زیادہ سے زیادہ سہولیات فراہم کی جائیں، کراچی سے 21600 عازمین روانہ ہوں گے۔
سردار محمد یوسف نے بتایا کہ پاکستان سے جو عازمین حج جائیں گے، کوشش ہے ان کی تعلیمات اور سہولیات مکمل ہوں، ہر گروپ کے ساتھ ناظم ہوگا تاکہ کوئی مسئلہ درپیش نہ آئے۔
وزیر مذہبی امور کا کہنا تھا کہ مکہ میں حجاج کرام اور عزیزیہ میں سب کیلئے اچھی عمارتیں لی گئی ہیں، وہاں اسپلٹ اے سی کا انتظام بھی کیا گیا ہے، اسی طرح اس سال ایگریمنٹ میں شامل ہے کہ شیلف لگائے جائیں، ٹرانسپورٹ کا انتظام بھی بہترہے۔
