اسلام آباد :(دنیا نیوز) سیکرٹری جنرل پاکستان تحریک انصاف سلمان اکرم راجہ نے کہا ہے کہ ملکی اہم قانون سازی کے لیے عمران خان کا باہر آنا ضروری ہے۔
دنیا نیوز کے پروگرام’’ دنیا مہربخاری کےساتھ‘‘ میں گفتگو کرتے ہوئے سلمان اکرم راجہ کا کہنا تھا کہ عدالتی فیصلوں پر بھی عملدرآمد نہیں کیا جاتا،عدالتی فیصلےکے بعد بھی عمران خان کی بہنوں کی ملاقات نہیں کرائی جارہی ہے ۔
انہوں نے کہا کہ ہم انتظامیہ کویہ اختیارنہیں دےسکتےکہ بانی سےکون ملےگا، کل جن لوگوں کوجیل ملاقات کے لیے بھیجا گیا ان میں سے دو، تین لوگوں کو نہیں جانتا، ایک ہی طریقہ جولسٹ ہم دیں اسی کے مطابق ملاقات کرائی جائے، رضیہ سلطانہ کو میں نہیں جانتا۔
سیکرٹری جنرل تحریک انصاف کا کہنا تھا کہ یہ بالکل ناقابل قبول صورتحال ہے،اس سےشکوک اور پارٹی ڈسپلن پر ایک ضرب ہے، اگرکوئی بن بلائےجیل جاتا ہے تو ان کوسمجھ لینا چاہیے، بہنوں کو ملنے نہیں دیا گیا اور یہ لوگ اندر چلے گئے، کل جو کچھ ہوا یہ اچھا نہیں ہوا ہے۔
سلمان اکرم راجہ نے کہا کہ آئندہ پارٹی میں سب کواحتیاط کرنی چاہیے، جس کا نام لسٹ میں نہ ہو وہ کسی کے کہنے پر ملاقات نہ کرے، اگر کسی کا نام لسٹ میں نہیں ہو گا تو اسے شک کی نگاہ سے دیکھا جائے گا، جن کوفون پر پیغام آتے ہیں ان کوکھل کر بات کرنی چاہیے۔
ان کا کہنا تھا کہ یہ لوگ اپنی قبولیت کی وجہ ظاہر کریں، مولانا نے پارٹی میں مشاورت کے لیے وقت مانگا ہے، کور کمیٹی کا اجلاس آج یا کل بلائیں گے، کسی کی فرمائش یا حکم پر نہیں مشاورت سے قانون سازی ہونی چاہیے، معدنیات کے حوالے سے جلد بازی میں کچھ نہیں ہوگا۔
سیکرٹری جنرل تحریک انصاف نے مزید کہا کہ ملکی اہم قانون سازی کےلیےبانی کا باہرآنا ضروری ہے، اس قانون سازی میں بہت بڑے مکالمےکی ضرورت ہے۔
