راولپنڈی:(دنیا نیوز) اڈیالہ جیل کے باہر سے حراست میں لی گئیں پاکستان تحریک انصاف کے بانی عمران خان کی تینوں بہنیں گھر روانہ ہوگئیں۔
عمران خان کی بہنوں علیمہ خان، نورین اور عظمیٰ خان کو اڈیالہ جیل جانے سے روک دیا گیا تھا، راولپنڈی پولیس نے بانی پی ٹی آئی سے ملاقات کے لیے آنے والی تینوں بہنوں کو حراست میں لے کر مقامی شادی ہال منتقل کیا اور گھر جانے کی ہدایت کی۔
بانی کی بہنوں نے گھر جانے سے انکار کیا، اڈیالہ جانے پر اصرار اور بھائی سے ملاقات کرانے پر زور دیا۔
اڈیالہ جیل سے ہٹائے جانے والوں میں بانی پی ٹی آئی کے ایک کزن اور اتحادی رہنما حامد رضا بھی شامل تھے، بانی پی ٹی آئی کی بہنوں کے ساتھ پولیس ٹیم بھی مقامی شادی ہال میں بدستور موجود رہی تاہم بہنوں نے ہال میں دھرنا دیا۔
بعدازاں بانی پی ٹی آئی کی تینوں بہنیں اپنے وکلا کے ہمراہ گھرجانے پررضامند ہوگئیں جس کے بعد پولیس انہیں لیکر شادی ہال سے روانہ ہوگئی۔
بانی پی ٹی آئی کی تینوں بہنیں ، کزن قاسم نیازی اپنے گھر روانہ ہوگئے اور صاحبزادہ حامد رضا بھی علیمہ خان کی گاڑی میں روانہ ہوئے۔
