اسلام آبا :(دنیا نیوز) رہنما پاکستان پیپلزپارٹی شرمیلا فاروقی نے کہا ہے کہ پنجاب والےچشمہ جہلم لنک کینال سے سندھ کاپانی چوری کرتےہیں۔
دنیا نیوزکےپروگرام’’ آن دی فرنٹ‘‘میں گفتگو کرتے ہوئے شرمیلا فاروقی کا کہنا تھا کہ مسلم لیگ(ن)کےساتھ ہمارا ایک معاہدہ ہے، ہم گرین انیشی ایٹو پروگرام کے خلاف نہیں ہے، ملک میں بارشیں پہلے ہی کم ہوئی ہے، تین صوبوں میں قحط سالی پیدا ہوسکتی ہے۔
انہوں نے الزام لگاتے ہوئے کہا کہ جب پنجاب کےپاس اپنا پانی نہیں ہوگا تو دریائےسندھ کا پانی چوری ہو گا، یہ پہلے بھی دریائےسندھ کا پانی چوری کرتے رہے ہیں، ہر سال سندھ اور پنجاب کا پانی پر جھگڑا شروع ہو جاتا ہے۔
رہنما پیپلزپارٹی کا کہنا تھا کہ سندھ میں چاول لگا رہے ہیں لیکن گزشتہ ایک ماہ سے سندھ میں پانی نہیں ہے، پنجاب والے چشمہ جہلم لنک کینال سے پانی چوری کرتے ہیں۔
شرمیلا فاروقی نے کہا کہ کہ پانی ایسا معاملہ جس پر جنگیں ہوجاتی ہیں، سندھ میں ایسا بھی ہوتا ہےمردے کونہلانے کے لیے بھی پانی نہیں ہوتا، ارسا آج تک پانی کی تقسیم کو منصفانہ نہیں بنا سکا، جب ملک میں پانی ہی نہیں تو نہریں کیسےبنیں گی۔
