کراچی: (ویب ڈیسک) کراچی میں تیزرفتار ٹرالر تلے کچلے جانے سے 2 موٹرسائیکل سوار جاں بحق جبکہ باپ اور بیٹا شدید زخمی ہوگئے۔
حادثہ ملیر میمن گوٹھ لنک روڈ کے قریب پیش آیا، حادثے کی اطلاع ملتے ہی پولیس اور امدادی ٹیمیں موقع پر پہنچ گئیں، متوفین کی لاشوں کو ضابطے کی کارروائی کے لئے ہسپتال منقتل کر دیا گیا۔
پولیس حکام کے مطابق حادثے کا شکار افراد 2 موٹر سائیکلوں پر سوار تھے جنہیں ٹرالر نے روند دیا تھا جبکہ حادثے کا ذمہ دار ڈرائیور موقع سے فرار ہوگیا جبکہ پولیس نے ٹرالر کو اپنے قبضے میں لے لیا۔
جاں بحق ہونے والوں کی شناخت 22 سالہ اسد اور 45 سالہ ریاض کے نام سے کی گئی جبکہ شدید زخمی ہونے والے 45 سالہ لکھو اور اس کے بیٹے 20 سالہ سدھورہ کو طبی امداد کیلئے ہسپتال منتقل کر دیا گیا۔
حادثے کا شکار افراد میمن گوٹھ کے ہی رہائشی بتائے جاتے ہیں تاہم پولیس واقعہ کی مزید تحقیقات کر رہی ہے۔
