اسلام آباد: (دنیا نیوز) وزیر داخلہ رانا ثناء اللہ سرکاری دورے پر عراق پہنچ گئے، عراقی وزیر داخلہ عبدالامیر الشماری، سفیراحمد امجد علی اور دیگر افسران نے وزیر داخلہ رانا ثنا اللہ کا استقبال کیا۔
وزیر داخلہ رانا ثنا اللہ خان نے عراقی صدر ڈاکٹر عبدالطیف رشید سے ملاقات کی جس میں دونوں ممالک کے مابین تجارت، دفاع اور آئی ٹی کے شعبہ میں تعاون بڑھانے پر اتفاق کیا گیا۔
عراقی صدر ڈاکٹر عبدالطیف رشید نے گفتگو کرتے ہوئے کہا ہے کہ پاکستانی فوج بہترین صلاحیتوں کی حامل ہے اور پاکستانی فوج نے دہشت گردی کے خلاف جنگ میں گراں قدر خدمات سر انجام دی ہیں۔
وزیر داخلہ رانا ثنا اللہ نے کہا ہے کہ پاکستان اور عراق کے درمیان برادرانہ تعلقات ہیں، دونوں ممالک نے دہشت گردی کا سامنا کیا اور اس کے خلاف جنگ میں بے شمار قربانیاں دی ہیں، پاکستان کی وزار ت داخلہ عراقی وزارت داخلہ کے ساتھ بھرپور تعاون کی خواہاں ہے۔
It was a pleasure meeting H.E. the Pres. of Iraq, Dr. Abdul Latif Jamal Rashid, earlier today. It was agreed to strengthen bilateral ties by promoting cooperation b/w the two countries in various areas, especially security, military training, and the economy.
— Rana SanaUllah Khan (@RanaSanaullahPK) August 2, 2023
pic.twitter.com/BdIQUtAZBk
علاوہ ازیں وزیر داخلہ رانا ثناء اللہ نے اپنے عراقی ہم منصب عبدالامیر الشماری سے بھی ملاقات کی، وزیر داخلہ نے شاندار مہمان نوازی پر عراقی ہم منصب کا شکریہ ادا کیا، اس دوران عراق کی جانب سے پاکستانی زائرین کا کوٹہ 50 ہزار سے ایک لاکھ کرنے کا فیصلہ کیا گیا۔
پاکستانی زائرین کو گروپ ویزہ کے علاوہ پاکستان میں عراقی سفارتخانے سے انفرادی ویزہ جاری کرنے کی منظوری دی گئی، عراقی وزیر داخلہ نے پاکستانیوں کیلئے ویزہ فیس میں کمی کی بھی یقین دہانی کروائی، رانا ثناء اللہ نے زائرین کو سہولیات کی فراہمی پر عراقی ہم منصب کا شکریہ ادا کیا۔
I met my brother, Abdul Amir Al-Shammari, today, where wide-ranging issues of mutual interest were discussed in detail. It was agreed to exchange Pakistan’s expertise in counter-terrorism and provide all the facilities to Pakistani pilgrims visiting Iraq.
— Rana SanaUllah Khan (@RanaSanaullahPK) August 2, 2023
pic.twitter.com/h39dtHRwXn
وزیر داخلہ رانا ثناء اللہ نے گفتگو کرتے ہوئے کہا کہ پاکستان عراق کی خود مختاری اور علاقائی سالمیت کا احترام کرتا ہے، دہشت گردی کا شکار عراق کی تعمیر نو کی کوششوں کی بھرپور حمایت کرتے ہیں، عراق پاکستان کے اداروں کی انسداد دہشتگردی میں مہارت سے فائدہ اٹھا سکتا ہے۔
عراقی وزیر داخلہ نے کہا کہ پاکستانی زائرین کو ہر ممکن سہولت فراہم کرنے کیلئے کوشاں ہیں، پولیس اکیڈمی فرانزک میں عراقی افسران اور کیڈٹس کی تربیت کی پیشکش کا خیرمقدم کرتے ہیں۔
