لاہور: (دنیا نیوز) نگران وزیراعلیٰ پنجاب محسن نقوی نے کہا ہے کہ کوئی بھی قوم تب تک ترقی نہیں کر سکتی جب تک خواتین مردوں کے شانہ بشانہ کھڑی نہ ہوں۔
خواتین کے عالمی دن کے موقع پر اپنے پیغام میں وزیراعلیٰ پنجاب محسن نقوی کا کہنا تھا کہ عورت ماں، بیٹی، بہن، بیوی ہر روپ میں قابل عزت اور قابل احترام ہے، دین اسلام میں خواتین کو مکمل حقوق دیئے گئے ہیں، خواتین کو جو حقوق دین اسلام میں دیئے گئے مغرب میں اس کا تصور بھی نہیں کیا جاسکتا۔
انہوں نے کہا کہ نبی کریمؐ نے خواتین کے ساتھ حسن سلوک سے پیش آنے کی تلقین کی ہے، نبی پاکؐ کی لاڈلی بیٹی خاتون جنت حضرت بی بی فاطمہ الزہرہ رضی اللہ تعالیٰ عنہا کی حیات پاک خواتین کے لئے بہترین نمونہ ہے۔
محسن نقوی کا کہنا تھا کہ محترمہ فاطمہ جناح، بے نظیر بھٹو، مریم مختار، ارفع کریم، ملالہ یوسف زئی، عاصمہ جہانگیر جیسی عظیم خواتین سب کے لئے مشعل راہ ہیں، پاکستانی خواتین سائنس سے سیاست تک، فن سے کھیل تک اور زندگی کے دیگر شعبوں میں کامیابیاں سمیٹ رہی ہیں، کوئی بھی قوم تب تک ترقی نہیں کر سکتی جب تک خواتین مردوں کے شانہ بشانہ کھڑی نہ ہوں۔
نگران وزیراعلیٰ نے کہا کہ پائیدار ترقی کے حصول کے لیے صنفی مساوات اور صنفی انصاف کی منزل کا حصول بے حد ضروری ہے، ترقی کی راہ میں خواتین کے مثبت کردار کو تسلیم کرتے ہیں، حکومت پنجاب خواتین کیلئے ہر شعبے میں ترقی کے یکساں مواقع اور سازگار ماحول کیلئے کوشاں ہے، خواتین کو معاشرتی ناہمواری کے اثرات سے محفوظ رکھنا حکومت کی اولین ترجیح ہے۔
محسن نقوی کا مزید کہنا تھا کہ خواتین کو معاشرے کی ترقی کے لیے گراں قدر خدمات سر انجام دینے پر خراج تحسین پیش کرتا ہوں، عالمی دن پر خواتین کے حقوق کا تحفظ کرنے کے عزم کا اعادہ کرتے ہیں۔
