اسلام آباد: (دنیا نیوز) صدر مملکت ڈاکٹر عارف علوی نے ہیوی انڈسٹریز ٹیکسلا کا دورہ کیا، آئی ایس پی آر ایچ آئی ٹی کے چیئرمین لیفٹیننٹ جنرل سید عامر رضا نے صدر مملکت کا استقبال کیا۔
صدرکو ایچ آئی ٹی کی فنی صلاحیتوں اور پیداواری سرگرمیوں کےبارے میں تفصیلی بریفنگ دی گئی اور خودانحصاری کی کوششوں، ریسرچ اور ڈویلپمنٹ کے منصوبوں کے بارے میں آگاہ کیا گیا، اس موقع پر صدر مملکت نے مختلف فیکٹریوں کا بھی دورہ کیا اور منصوبوں پر ہونے والے کام کا معائنہ کیا۔
آئی ایس پی آر کے مطابق صدر ڈاکٹر عارف علوی نے ریسرچ اور ڈویلپمنٹ کے جاری منصوبوں میں خصوصی دلچسپی لی، انہوں نے بلٹ پروفنگ اور فوجی گاڑیوں کو بارودی سرنگوں سے محفوظ رکھنے کے پراجیکٹس میں بھی دلچسپی ظاہر کی۔
صدر عارف علوی نے جدید ٹیکنالوجی کے حصول کے ذریعے خود انحصاری حاصل کرنے پر ایچ آئی ٹی کی کوششوں کو سراہا، انہوں نے ایچ آئی ٹی کی صلاحیتوں پر اپنے مکمل اعتماد کا اظہار کیا اور تنظیم کو جدید دفاعی پیداوار کے ادارے میں تبدیل کرنے پر ایچ آئی ٹی کے عزم کو سراہا۔
