کراچی: (دنیا نیوز) کراچی میں کورونا ایس او پیز کی خلاف ورزی پر انتظامیہ نے ایکشن لیتے ہوئے 5 ریسٹورنٹس سیل کر دیئے۔
کورونا کی دوسری لہر کے بعد شہر قائد میں جان لیوا وبا کے کیسز بڑھنے لگے جس کے لئے انتظامیہ متحرک ہوگئی۔ کراچی کے ضلع جنوبی کے علاقے کلفٹن بلاک 2 اور کھڈا مارکیٹ پر انتظامیہ نے چھاپے مارے۔ ڈپٹی کمشنر ساؤتھ کے مطابق ایس او پیز کی خلاف ورزی کرنے پر 5 ریسٹورنٹ سیل کر دیئے گئے۔ ہوٹل حکومت کی جانب سے دیئے گئے اوقات پر بند نہیں کئے گئے تھے۔ شہر کے دیگر علاقوں میں بھی کارروائیاں جاری ہیں۔
دوسری جانب نیشنل کمانڈ اینڈ آپریشن سینٹر کے تازہ ترین اعدادوشمار کے مطابق کورونا وائرس سے 34 افراد جاں بحق ہوگئے، جس کے بعد اموات کی تعداد 7 ہزار 55 ہوگئی۔ پاکستان میں کورونا کے تصدیق شدہ کیسز کی تعداد 3 لاکھ 49 ہزار 992 ہوگئی۔
گذشتہ 24 گھنٹوں کے دوران ایک ہزار 808 نئے کیسز رپورٹ ہوئے، پنجاب میں ایک لاکھ 8 ہزار 221، سندھ میں ایک لاکھ 52 ہزار 72، خیبر پختونخوا میں 41 ہزار 258، بلوچستان میں 16 ہزار 226، گلگت بلتستان میں 4 ہزار 409، اسلام آباد میں 22 ہزار 765 جبکہ آزاد کشمیر میں 5 ہزار 41 کیسز رپورٹ ہوئے۔
ملک بھر میں اب تک 48 لاکھ 10 ہزار 182 افراد کے ٹیسٹ کئے گئے، گذشتہ 24 گھنٹوں کے دوران 36 ہزار 686 نئے ٹیسٹ کئے گئے، اب تک 3 لاکھ 20 ہزار 849 مریض صحتیاب ہوچکے ہیں جبکہ ایک ہزار 164 مریضوں کی حالت تشویشناک ہے۔
پاکستان میں کورونا سے ایک دن میں 34 افراد جاں بحق ہوئے جس کے بعد وائرس سے مرنے والوں کی تعداد 7 ہزار 55 ہوگئی۔ پنجاب میں 2 ہزار 438، سندھ میں 2 ہزار 704، خیبر پختونخوا میں ایک ہزار 302، اسلام آباد میں 248، بلوچستان میں 154، گلگت بلتستان میں 93 اور آزاد کشمیر میں 116 مریض جان سے ہاتھ دھو بیٹھے۔
