اسلام آباد: (دنیا نیوز) وزیراعظم عمران خان نے کہا ہے آزمائش کے وقت میں متحدہ عرب امارات نے پاکستان کا ساتھ دیا۔
وزیراعظم عمران خان نے اپنے ٹویٹر پیغام میں کہا ہے متحدہ عرب امارات کی حکومت کا تعاون پر کرنے پر شکریہ ادا کرتے ہیں، یو اے ای کا تعاون پاکستان کے ساتھ دوستی اور خلوص کو ظاہر کرتی ہے، یو اے ای حکومت پاکستان کی مالی معاونت کی خاطر 3 ارب ڈالر فراہم کر رہی ہے۔
آزمائش کی گھڑی میں نہایت فراخدلی سے پاکستان کا ساتھ دینے پر میں متحدہ عرب امارات کی حکومت کا مشکور ہوں۔ اماراتی حکومت کا تعاون ہماری دوستی اور دہائیوں پر محیط تعلقات کا عکاس ہے۔
— Imran Khan (@ImranKhanPTI) December 21, 2018
عالمی جریدے بلوم برگ کے مطابق متحدہ عرب امارات کی حکومت پاکستان کی معالی معاونت کی خاطر 3 ارب ڈالر فراہم کر رہی ہے، ابوظہبی فنڈ ڈویلپنٹ جلد ہی یہ رقم اسٹیٹ بینک آف پاکستان میں جمع کرا دے گا، رقم کی منتقلی سے زرمبادلہ کے ذخائر میں اضافہ ہوگا۔ ابوظہبیٰ فنڈ ڈویلپنٹ کے تعاون سے پاکستان میں تعلم، صحت اور توانائی جیسے ترقیاتی منصوبوں پر سرمایہ کاری کی گئی ہے۔
معاشی تجزیہ کاروں کے مطابق رواں مالی سال پاکستان کو لگ بھگ 12 ارب ڈالر کے خسارے کا سامنا ہے، جس میں سے سعودیہ عرب 2 ارب ڈالر اسٹیٹ بینک میں منتقل کرچکا ہے جبکہ مزید 1 ارب ڈالر چند روز میں وصول ہونے کا امکان ہے، اس کے علاوہ متحدہ عرب امارات اور چین سے بھی رقم ملنے سے زرمبادلہ کے ذخائر میں اضافے کے ساتھ ساتھ ڈالر کے مقابلے روپے کی قدر میں استحکام دیکھںے میں آئے گا۔
