اسلام آباد: (دنیا نیوز) مشیر نجکاری محمد علی نے کہا کہ پی آئی اے کی نجکاری ایئرلائن اور معیشت دونوں کے لئے بہتر ہے۔
مشیر نجکاری محمد علی نے کہا کہ پی آئی اے کی نجکاری سے قبل لندن کا روٹ بھی بحال کرلیں گے، پی آئی اے میں اب پہلے سے زیادہ منافع کی بڑی گنجائش ہے، پی آئی اے اس وقت انجن، مرمت اور جہازوں کی ادائیگی خود کررہا ہے۔
محمد علی کا کہنا تھا کہ پی آئی اے خریدنے والوں کو 80 فیصد سے زیادہ حصص بھی دے سکتے ہیں، پی آئی اے خریدنے والے کو آئندہ 5 سال تک ٹیکس کی رعایتوں کا فائدہ ہوگا، حکومتی ری سٹرکچرنگ سے پی آئی اے کی مالیاتی حیثیت روز بہتر ہو رہی ہے۔
مشیر نجکاری کا مزید کہنا تھا کہ پی آئی اے کی بولی دینے والوں کو حسابات کی جانچ پڑتال کے لئے 60 دن کا وقت دیں گے، پی آئی اے کی بولی دہندہ کمپنی کا 2 سال میں 200 ارب ریونیو ہونا ضروری ہے۔
انہوں نے کہا کہ پی آئی اے کی بولی دہندہ کمپنی کا تین سال پہلے 100 ارب کا ریونیو ہونا ضروری ہے۔
