اسلام آباد: (دنیا نیوز) پاکستان انٹر نیشنل ایئر لائنز (پی آئی اے) کی پہلی پرواز آذربائیجان کے دارالحکومت باکو میں لینڈ کر گئی، باکو کے حیدر علی ائیرپورٹ پر پرواز اور مسافروں کا والہانہ استقبال کیا گیا۔
پی آئی اے کے ترجمان عبداللہ حفیظ خان کی طرف سے جاری بیان کے مطابق آذربائیجان میں پاکستانی سفیر قاسم محی الدین، ڈائریکٹر ائیرپورٹ تیمور حسن اور وزیر ٹرانسپورٹ رشد نبی نے پرواز کا استقبال کیا جبکہ پی آئی اے اور پاکستانی سیاحوں کیلئے نیک تمنائوں کا اظہار کیا۔
دوران پرواز کیک بھی کاٹا گیا اور مسافروں میں تحائف کے ساتھ ساتھ قرعہ اندازی کے ذریعے موبائل فون بھی تقسیم کئے گئے۔ پی آئی اے کی باکو سے لاہور کی پرواز پی کے ۔160 واپسی کیلئے روانہ ہوگئی۔
واضح رہے باکو لینڈ کرنے والی پاکستان انٹرنیشنل ایئر لائنز (پی ائی اے) کی لاہور سے باکو کے لئے پہلی پرواز 11 بجکر 50 منٹ پر روانہ ہوئی جسے وزیر دفاع و ہوابازی خواجہ محمد آصف نے لاہور ایئر پورٹ پر الوداع کیا۔
اس موقع پر گفتگو کرتے ہوئے وزیر دفاع خواجہ محمد آصف نے کہا کہ کچھ عرصہ قبل لوگوں کا خیال تھا کہ پی آئی اے مشکل سے کبھی باہر نہیں نکل سکے گی تاہم وزیر اعظم کی زیر قیادت جامع اصلاحاتی پروگرام کے بعد آج پی آئی اے اپنے قدموں پر کھڑی ہے۔
انہوں نے کہا کہ پی آئی اے اپنے نیٹ ورک کو وسعت دے رہا ہے اور باکو اس سلسلے کی ایک کڑی ہے، انہوں نے کہا کہ اس پرواز سے پاکستان اور آذربائیجان کے مابین تعلقات مزید مستحکم ہوں گے۔
