کراچی: (دنیا نیوز) پی آئی اے نے برطانیہ کے لیے فلائٹ آپریشن کی تیاری مکمل کرلی۔
پی آئی اے نے برطانیہ کے براہ راست فلائٹ آپریشن کے لیے شعبہ انجینئرنگ کے حکام کو اپنا سب سے بڑا 400 سیٹر بوئنگ 777 طیارہ مکمل تیار رکھنے کی ہدایت کر دی۔
ذرائع کے مطابق پی آئی اے پر برطانیہ میں پابندی ختم ہونے کا امکان ہے، پی آئی اے برطانیہ کے تین شہروں لندن، مانچسٹر اور برمنگھم کے لیے فلائٹ آپریشن شروع کرنے کی تیاری مکمل کر رہی ہے۔
پی آئی اے ذرائع کے مطابق برطانیہ کے لیے فلائٹ آپریشن پر پابندی کے خاتمے کے ممکنہ فیصلے کے حوالے سے برطانوی حکام آئندہ چند روز میں پی آئی اے اور سول ایوی ایشن کو تحریری طور آگاہ کریں گے۔
یاد رہے کہ جولائی 2020 میں جعلی لائسنس پائلٹس سکینڈل سامنے آنے پر برطانیہ اور یورپی ملکوں میں پی آئی اے سمیت تمام پاکستانی ایئرلائنز کی پروازوں پر پابندی عائد کی گئی تھی۔
یورپی ملکوں میں پی آئی اے سمیت تمام پاکستانی ایئرلائنز پر پابندی ہٹ چکی ہے، اب برطانیہ میں چند دن میں پاکستانی ایئرلائنز پر پابندی ختم ہونے کا امکان ہے، برطانیہ میں پروازوں پر پابندی سے پی آئی اے کو 120 ارب روپے زائد نقصان برداشت کرنا پڑا ہے۔
