کراچی: (دنیا نیوز) کراچی میں ہونیوالی پہلی انڈر 23 ورلڈ سکواش چیمپئن شپ کا ٹائٹل پاکستان کے نور زمان نے اپنے نام کرلیا۔
ڈی اے کریک کلب میں ہونیوالی چیمپئن شپ کے پانچ گیمز پر مشتمل فائنل پاکستان کے نور زمان نے مصری حریف کریم الترکی کٰکلاف دو صفر کے خسارے سے کم بیک کے بعد تین سیٹ سے کامیابی حاصل کی۔
کور کمانڈر لیفٹیننٹ جنرل اویس دستگیر اور وزیر اعلیٰ سندھ مراد علی شاہ نے انعامات تقسیم کیے۔
انڈر23 ورلڈ چیمپئن شپ کے فاتح نور زمان کو 5 ہزار 250 ڈالر انعام دیا گیا۔ مصر کے کریم التورکی کو 3 ہزار 450 ڈالر کا انعام دیا گیا، چیمپئن شپ کی مجموعی انعامی رقم 60 ہزار ڈالرز تھی۔
نورزمان جیت کی خوشی میں آبدیدہ ہوگئے، اس موقع پر نور زمان نے کہا کہ فائنل جیتنے کے لیے سخت محنت کی، میری محنت کا صلہ اللہ تعالیٰ نے مجھے دیا۔
انہوں نے کہا کہ جیت پورے ملک کے لیے اعزازہے، میچ کے لیے پریشر نہ لینے کا فیصلہ کیا تھا، آخری لمحےتک فائٹ کی اور کامیابی اپنےنام کی۔
وزیراعلیٰ سندھ مراد علی شاہ نے انڈر 23 ورلڈ سکواش چیمپئن شپ کا فائنل جیتنے پر نور زمان کو مبارکباد پیش کرتے ہوئے کہا کہ مقابلہ انتہائی دلچسپ تھا،دیکھنے میں بڑا لطف آیا، نور زمان نے بڑی مہارت سے کھیلا اور جیت اپنے نام کی، ہمارے کھلاڑی اسی لگن کو برقرار رکھتے ہوئے ملک کا نام روشن کرتے رہیں گے۔
