اسلام آباد: (دنیا نیوز) وزیراعظم شہباز شریف کے مشیر برائے سیاسی امور رانا ثنا اللہ نے کہا کہ 12 سال سے رویہ افسوس ناک ہے، بانی کا رویہ دیکھ کر پھر ہم مایوس ہو جاتے ہیں، اگر یہ بیٹھ جائیں تو تمام مسائل حل ہو سکتے ہیں۔
دنیا نیوز کے پروگرام ’’دنیا مہر بخاری کے ساتھ‘‘ میں گفتگو ہوئے رانا ثنا اللہ نے کہا کہ ملک کے مفاد کے لیے اسٹیبلشمنٹ سمیت سب کو بیٹھنا چاہیے، ملکی معاملات پر قومی اتفاق رائے پیدا کرنا چاہیے۔
رانا ثنا اللہ نے کہا کہ غلط بات ہے، کوئی بیک چینل رابطے نہیں ہو رہے، یہ مسلم لیگ (ن) نہیں سیاسی اتحادیوں کی حکومت ہے، اگر اپوزیشن کا گرینڈ الائنس بن جاتا ہے تو پھر جلاؤ گھیراؤ نہیں ہو گا۔
انہوں نے کہا کہ محمود اچکزئی، اختر مینگل، مولانا فضل الرحمان جیسے سیاست دان کفن باندھنے والی بات نہیں کرتے، مولانا فضل الرحمان کی اپنی ایک رائے ہے، یہ حالات سیاست دان کے ہی پیدا کردہ ہیں۔
مشیروزیراعظم برائےسیاسی امور نے کہا کہ یہ کہتے ہیں حکومت نہیں اسٹیبلشمنٹ سے بات کریں گے، اسٹیبلشمنٹ کے انکار پر بھی شرمندہ نہیں ہوتے، سیاست دانوں کو ہی آپس میں بیٹھ کر بات کرنا ہو گی۔
رانا ثنا اللہ نے کہا کہ حکومت نے ملک کو بحران سے نکالا ہے، ملک کو استحکام کی ضرورت ہے، اگر عدالت کا فیصلہ بانی کے حق میں آجائے تو صبح باہر آجائیں گے۔
انہوں نے کہا کہ بانی کا ٹویٹ، خطوط جاری رہیں گے تو پھر سیم پیج کبھی نہیں آئے گا، بانی خود ہی اس حکومت کی انشورنس ہیں، بانی کو تمام سیاسی جماعتوں کے ساتھ بیٹھنا چاہیے۔
رانا ثنا اللہ نے کہا کہ سیاست میں کچھ بھی ہوسکتا ہے، بلاول بالکل وزیراعظم کے امیدوار ہیں، بلاول کی کوشش کامیاب ہوتی ہے یا نہیں اللہ کو معلوم ہے۔
انہوں نے کہا کہ پیپلزپارٹی اتحادی حکومت کا حصہ ہے، اتحادی حکومت میں جو چیزیں طے پاچکیں اس ترتیب میں کوئی تبدیلی نہیں آئے گی۔
مشیروزیراعظم برائےسیاسی امور نے کہا کہ یہ سارا ارینجمنٹ ہے، یہ ایک معاہدہ کے تحت ہے، معاہدے میں ساری چیزیں طے ہوئی تھیں۔
