پشاور: (دنیا نیوز) مشیر اطلاعات خیبرپختونخوا بیرسٹر ڈاکٹر سیف نے کہا ہے کہ پرامن احتجاج کی کال پر لیگی درباری وزراء کی چیخیں پھر شروع ہوگئیں۔
خواجہ آصف اور احسن اقبال کے بیان پر ردعمل دیتے ہوئے بیرسٹر سیف کا کہنا تھا کہ پرامن احتجاج ہمارا جمہوری اور آئینی حق ہے، جعلی حکومت کی پی ٹی آئی احتجاج سے کانپیں ٹانگ رہی ہیں۔
انہوں نے کہا کہ بانی پی ٹی آئی عمران خان کے خلاف جعلی مقدمات کے خاتمے اور رہائی تک احتجاجی سلسلہ جاری رہے گا، جعلی حکومت کے اوچھے ہتھکنڈے الٹا ان کے گلے پڑیں گے۔
ان کا کہنا تھا کہ خواجہ آصف ایک خاتون سے ہارے اور فارم 47 پر وزیر بنے ہیں، خود ساختہ ارسطو احسن اقبال سی پیک پر سیاسی بیان بازی کر رہے ہیں، جعلی حکومت کے دور میں ملک کی معیشت کا پہیہ جام ہو چکا ہے، فسطائیت کے ہوتے ہوئے ملکی ترقی ناممکن ہے۔
صوبائی مشیر اطلاعات نے مزید کہا کہ شنگھائی تعاون تنظیم کے سربراہی اجلاس پر جعلی حکومت اپنی سیاسی دکان چمکانے کی ناکام کوشش کر رہی ہے، معاشی و سیاسی مسائل کی جڑ جعلی حکومت ہے۔
