لاہور: (دنیا نیوز)جماعت اسلامی کے امیر سراج الحق نے کہا کہ کشمیر اور فلسطین کی آزادی کیلئے آخری سانس تک جدوجہد کریں گے۔
لاہور میں یوم یکجہتی کشمیر کے حوالے سے نکالی گئی ریلی سے خطاب کرتے ہوئے انہوں نے کہا کہ فلسطینی اور کشمیری عوام ہماری طرف دیکھ رہے ہیں، آج کشمیر سے پاکستان آنے والے دریا خون آلود ہیں۔
سراج الحق نے کہا کہ عالم اسلام کے حکمران سو رہے ہیں، کوئی ایک تو ان میں صلاح الدین ایوبی ہوتا، آج ہمارے کشمیری اور فلسطینی بھائی غلامی کی زنجیروں میں جکڑے ہوئے ہیں، کشمیری کہتے ہیں ہم پاکستان کے ساتھ ہیں۔
انہوں نے کہا کہ آج کا جلسہ فلسطین اور کشمیر کے ساتھ نئی یکجہتی کا اظہار ہے،جو جذبہ خواتین میں ہے کاش یہ جذبہ پاکستان کی قیادت میں ہوتا، 76 سال سے فلسطین اور کشمیر کے عوام آزادی کیلئے ترس رہے ہیں۔
