لاہور: (ویب ڈیسک) پیپلز پارٹی کے چیئرمین اور وزیرِخارجہ بلاول بھٹو زرداری نے ملک کی پائیدار ترقی کیلئے بہترین حکمت عملی شرحِ خواندگی میں اضافہ کو قرار دیتے ہوئے کہا ہے کہ شرحِ خواندگی بڑھانے کی مہم کو قومی تحریک میں تبدیل کرنا ناگزیر بن چکا ہے۔
عالمی یومِ خواندگی کے موقع پر جاری پیغام میں انہوں نے کہا کہ آزادی کے بعد پاکستان کی کئی شعبوں میں کارکردگی نمایاں رہی ہے، لیکن ملک میں ناخواندہ افراد کی تعداد پریشان کن حد تک زیادہ ہے۔ غربت، بیروزگاری، عدم برداشت اور بدامنی جیسے مسائل کے پیچھے ناخواندگی بھی ایک سبب ہے۔ پیپلز پارٹی کے ہر دورِ حکومت میں تعلیم کو ہمیشہ اولین ترجیحات میں رکھا گیا۔
وزیر خارجہ نے کہا کہ قائد عوام شہید ذوالفقار علی بھٹو کے دورِ حکومت میں سب سے زیادہ سکول اور کالجز کا قیام عمل میں آیا۔ شہید بینظیر بھٹو نے تعلیم کی بجٹ میں اضافہ کیا گیا اور اعلیٰ تعلیمی ادارے قائم کیے۔ سندھ کی عوامی حکومت کی جانب سے پرائمری سے اعلیٰ ثانوی تک تعلیم مفت ہے۔
بلاول نے عزم کا اعادہ کرتے ہوئے کہاکہ پیپلز پارٹی پورے ملک میں عوام کو پرائمری سے اعلیٰ تعلیم تک مفت تعلیم کی فراہمی کے لیے جدوجہد جاری رکھے گی، کیونکہ شرحِ خواندگی کو سو فیصد تک پہنچائے بغیر ہم قوم کے بانی اجداد کے خوابوں کو حقیقت میں تبدیل اور ان کے مشن کو مکمل نہیں کرسکتے۔
