اسلام آباد: (دنیا نیوز) وفاقی تحقیقاتی ادارے (ایف آئی اے) نے ہائی پروفائل مقدمات کی تفصیلات سپریم کورٹ آف پاکستان میں جمع کروا دیں۔
ایف آئی اے کی طرف سے بتایا گیا ہے کہ پاکستان تحریک انصاف کے ناراض رہنما جہانگیر ترین کے خلاف شوگر ملز میں خردبرد کے کئی مقدمات زیر تفتیش ہیں، ایک کیس میں 4.3 ارب اور دوسرے کیس میں 2.2 ارب کی خردبرد کا الزام ہے۔
ایف آئی اے کے مطابق جہانگیر ترین اور علی ترین سمیت دیگر کیس میں ملزمان ہیں، سابق رکن قومی اسمبلی کے خلاف سرمایہ کاری میں بھی خورد برد کا کیس زیر تفتیش ہے۔ ان پر سرمایہ کاری میں 3.3 ارب کی خردبرد کا الزام ہے۔ ان کے خلاف چینی سیکنڈل پر بھی تحقیقات کی جارہی ہیں۔
ایف آئی اے کے مطابق ای او بی آئی کرپشن کیس کی بھی سماعت کی جا رہی ہے، وزیراعظم شہباز شریف اور وزیراعلی پنجاب میاں محمد حمزہ شہباز کے خلاف بھی منی لانڈرنگ کیس میں تفتیش جاری ہے، دونوں کے خلاف 16 ارب کی منی لانڈنگ کیس میں چالان جمع ہوچکا ہے۔ ان دونوں پر ابھی تک فرد جرم عائد نہیں ہو سکی، منی لانڈرنگ کیس میں سلمان شہباز شریف، ملک مقصود اور طاہر نقوی مفرور ہیں۔
