ممبئی: (ویب ڈیسک) سابق بھارتی کرکٹر اور سیاستدان نوجوت سنگھ سدھو کی اہلیہ نے سٹیج 2 ’انویسو کینسر‘ کی تشخیص کے بعد ٹوئٹر کے ذریعے جیل میں قید شوہر کیلئے جذباتی پیغام جاری کردیا۔
سدھو کی اہلیہ نوجوت کور نے ٹوئٹر اکاؤنٹ سے اپنے جذبات سے بھری اپنی ٹوئٹ میں اپنے شوہر کو مینشن کرتے ہوئے لکھا کہ وہ جیل میں ایک ناکردہ جرم کی سزا کاٹ رہے ہیں، جو بھی ملوث ہیں انہیں معاف کردیں۔
انہوں نے لکھا کہ میں باہر آپ کے انتظار میں ہر روز آپ سے زیادہ مصیبت برداشت کر رہی ہوں، ہمیشہ کی طرح کوشش کرتی ہوں کہ آپ کی تکلیفوں کو دور کر سکوں، آپ سے کہتی ہوں کہ اپنی تکلیفیں مجھے بانٹ دیں۔
نوجوت کور نے مزید لکھا کہ اب چھوٹی سی بہتری آنا شروع ہوئی تھی، لیکن مجھے معلوم تھا کہ یہ غلط ہو رہا ہے، میں آپ کا انتظار کرتی رہی اور دیکھتی رہی کہ آپ کے ساتھ انصاف نہیں کیا جا رہا تھا، بار بار ناانصافی ہو رہی تھی۔
2/2 Waited for You, seeing you were denied justice again and again.Truth is so powerful but it takes your tests time and again. KALYUG.Sorry can’t wait for you because it’s stage 2 invasive cancer. Going under the knife today. No one is to be blamed because it’s GODS plan:PERFECT
— DR NAVJOT SIDHU (@DrDrnavjotsidhu) March 22, 2023
انہوں نے لکھا کہ سچ بہت طاقتور ہے لیکن وہ آپ کا بار بار امتحان لیتا ہے، یہ کلیوگ ہے۔
نوجوت کور نے لکھا کہ مجھے معاف کرنا میں آپ کا انتظار نہیں کرسکتی کیونکہ یہ سٹیج ٹو کینسر ہے اور میں سرجری کروانے جا رہی ہوں۔
اپنی ٹوئٹ کے آخر میں نوجوت کور کا کہنا تھا کہ میں کسی پر الزام نہیں دے رہی بس یہ خدا کی مرضی ہے۔
یاد رہے کہ سابق بھارتی کرکٹر اور سیاستدان نوجوت سنگھ سدھو کو 34 سال پرانے کیس میں سپریم کورٹ سے سزا کے بعد مئی 2022 میں پٹیالا کے سینٹرل جیل میں بھیج دیا گیا تھا، انہیں 1988 کے ’روڈ ریج ڈیتھ‘ کے مقدمے میں ایک سال قید کی سزا سنائی گئی تھی۔
