لاہور: (ویب ڈیسک) پاکستان کے معروف گلوکار عطاء اللہ عیسیٰ خان خیلوی نے کہا ہے کہ مجھے یقین ہے اور ایمان ہے کہ عمران خان دوسری مدت کے لیے بھی منتخب ہو جائیں گے۔
نجی ٹی وی سے گفتگو کرتے ہوئے عطاء اللہ عیسیٰ خیلوی نے کہا کہ اگرچہ وہ زائدالعمری کی وجہ سے کمزور ہوچکے ہیں، تاہم ان سے متعلق پھیلنے والی زیادہ تر خبریں غلط ہوتی ہیں۔ وہ لاہور چھوڑ کر آبائی شہر میاں والی منتقل ہو گئے ہیں، کیوںکہ بڑا شہر ہونے کی وجہ سے لاہور میں کورونا اور ڈینگی جیسے امراض پھیل رہے تھے۔
عطاء اللہ عیسیٰ خیلوی کے مطابق وہ میاں والی میں زیادہ تر دریائے سندھ کے کنارے وقت گزارتے ہیں، جہاں ان کی جوانی زیرو میٹر ہوجاتی ہے اور انہیں سکون و فرحت محسوس ہوتی ہے۔
ایک سوال کے جواب میں گلوکار نے بتایا کہ انہوں نے دو شادیاں کیں اور ان کے بڑے صاحبزادے سانول امریکا میں ہیں جب کہ ان کی بیٹی لاریب بھی امریکا میں ہیں اور وہ ہولی وڈ فلموں میں اینیمیشن اور ایفیکٹس ایڈیٹر کے طور پر خدمات سر انجام دیتی ہیں جب کہ ان کے ایک بیٹے بی بی سی میں ملازمت کرتے ہیں۔
سیاست پر بات کرتے ہوئے عطاء اللہ عیسیٰ خیلوی نے کہا کہ انہیں یقین ہے کہ پاکستان میں تبدیلی آکر رہے گی، ابھی عمران خان کو محض تین سال ہوئے ہیں اور اتنی کم مدت میں تو کوئی درخت بھی پھل نہیں دیتا۔ تبدیلی کے لیے عمران خان کو مزید کچھ وقت دیا جانا چاہیے اور انہیں یقین ہے کہ ملک میں تبدیلی آکر رہے گی۔
ایک سوال کے جواب میں انہوں نے کہا کہ انہیں یقین ہے اور ان کا ایمان ہے کہ وزیراعظم عمران خان دوسری مدت کے لیے بھی منتخب ہوگا، کیوں کہ وہ انہیں اچھی طرح جانتے ہیں، وہ اچھے شخص ہیں۔
انہوں نے عمران خان کے ساتھ اختلافات کی افواہوں کو بھی مسترد کیا اور کہا وہ پاکستان تحریک انصاف (پی ٹی آئی) کے سربراہ کو اپنا دل دے چکے ہیں۔ ان کا جب بھی دل چاہتا ہے وہ عمران خان سے ملنے چلے جایا کرتے ہیں اور جب بھی وزیر اعظم کا دل گانے سننے کے لیے بیتاب ہوتا ہے تو انہیں بلالیتے ہیں۔
