ڈیرہ غازی خان: (دنیا نیوز) پنجاب کے پی کے بارڈر پر ڈیرہ غازی خان پولیس، سی ٹی ڈی اور رینجرز ٹیموں کی شاندار کارروائی، تھانہ وہوا کے علاقہ کوتانی تل میں خوارجی دہشت گردوں سے مقابلہ، 2 دہشتگرد ہلاک، متعدد زخمی ہو گئے۔
ترجمان پنجاب پولیس کے مطابق پٹرولنگ پر مامور پولیس، رینجرز، سی ٹی ڈی ٹیموں نے دہشتگردوں کی موجودگی کی اطلاع پر فوری ایڈوانس کیا، پولیس ٹیموں کا تھانہ وہوا کے علاقہ کوتانی تل میں خوارجی دہشت گردوں سے سامنا ہوا۔
پنجاب پولیس کے ترجمان نے بتایا کہ خوارجی دہشتگرد راکٹ، ہینڈ گرنیڈ اور دیگر بھاری اسلحہ سے لیس تھے، پولیس، رینجرز اور سی ٹی ڈی کے جوانوں نے جوانمردی سے بھرپور کارروائی کی، مقابلہ کے دوران دو خوارجی دہشتگرد جہنم واصل، متعدد زخمی ہوئے۔
ترجمان پنجاب پولیس کے مطابق پولیس ٹیموں کی بھرپور کارروائی سے دہشت گرد جھاڑیوں اور ٹیلوں کی اوٹ لے کر فرار ہو گئے، دہشتگردوں سے مقابلہ میں ایلیٹ اہلکار عدنان حبیب اور سی ٹی ڈی اہلکار غضنفر معمولی زخمی ہوئے۔
پنجاب، خیبرپختونخوا بارڈر کے قریب دہشتگردوں کی نقل و حرکت کے پیش نظر پولیس ہائی الرٹ تھی، اطلاع ملتے ہی ڈی پی او سید علی کی زیر قیادت بیک اپ ٹیمیں فوری موقع پر پہنچیں۔
آئی جی پنجاب ڈاکٹر عثمان انور نے دہشتگردوں کو جہنم واصل کرنے پر ڈی جی خان پولیس کو شاباش دی، پولیس، رینجرز اور سی ٹی ڈی ٹیموں کا سرحدی علاقے میں سرچ اور سویپ آپریشن جاری ہے۔
