لاہور:(ویب ڈیسک )محکمہ انسدادِ دہشت گردی (سی ٹی ڈی) پنجاب نے صوبے بھر میں انٹیلی جنس پر مبنی 73 آپریشنز کیے، جس کے نتیجے میں 10 دہشت گردوں کو گرفتار کر لیا گیا۔
سی ٹی ڈی کی جانب سےجاری بیان میں بتایا گیا کہ سی ٹی ڈی نے دہشت گردی کے خطرے کے پیش نظر پنجاب کے مختلف شہروں میں انٹیلی جنس کی بنیاد پر 73 آپریشن کیے۔
ترجمان سی ٹی ڈی کا کہنا تھا کہ آپریشن کے دوران 10 دہشت گردوں کو گرفتار کر لیا گیا،یہ کارروائیاں راولپنڈی، ٹوبہ ٹیک سنگھ، خوشاب، بہاولنگر، رحیم یار خان، راجن پور، بھکر اور جہلم میں کی گئیں۔
اپنے بیان میں ترجمان نے کہا کہ کالعدم تحریک طالبان پاکستان (ٹی ٹی پی) سے وابستہ 2 خطرناک دہشت گردوں کو خوشاب اور جہلم سے گرفتار کیا گیا، سی ٹی ڈی نے دھماکا خیز مواد، ایک آئی ای ڈی بم، ایک ڈیٹونیٹر، 35 فٹ سیفٹی فیوز وائر، پمفلٹس، نقدی اور موبائل فون برآمد کر لیے۔
ترجمان سی ٹی ڈی کا کہنا تھا کہ دہشت گردوں کی شناخت ریاض، شفیق، راشد، جاوید، ظہیر، ظہیر الدین، حفیظ، وزیر، آصف اور وحید کے نام سے ہوئی ہے،دہشتگرد مختلف مقامات پر کارروائیاں کرکے لوگوں میں خوف و ہراس پھیلانا چاہتے تھے۔
اسی طرح گزشتہ ایک ہفتے کے دوران 758 کومبنگ آپریشنز کے دوران 107 مشتبہ افراد کو گرفتار کیا گیا اور 30 ہزار 394 افراد سے پوچھ گچھ کی گئی۔
