کراچی: (دنیا نیوز) اینٹی نارکوٹکس فورس (اے این ایف) کا تعلیمی اداروں اور ملک کے مختلف شہروں میں منشیات سمگلنگ کے خلاف کریک ڈاؤن جاری ہے۔
ترجمان اے این ایف کے مطابق 3 مختلف کارروائیوں میں 2 ملزمان گرفتار کر کے 27 لاکھ سے زائد مالیت کی 26.574 کلو گرام منشیات برآمد کر لی۔
حکام کا کہنا ہے کہ اٹک میں تین میلا چوک کے قریب ملزم کے قبضے سے 174 گرام چرس برآمد ہوئی، گرفتار ملزم نے تعلیمی اداروں کے طلباء کو منشیات فروخت کرنے کا اعتراف کیا ہے۔
کراچی میں کوریئر آفس کے ذریعے نیوزی لینڈ بھیجے جانے والے پارسل سے 2.4 کلو گرام آئس برآمد ہوئی جبکہ بلوچستان میں پشین کے علاقے میں ہوٹل کے قریب رکشہ میں چھپائی گئی 24 کلو گرام چرس برآمد کر کے افغان باشندہ گرفتار کر لیا۔
ترجمان کے مطابق گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
