لاہور: (دنیا نیوز) وزیراعلیٰ مریم نواز نے کہا ہے کہ پنجاب میں سرمایہ کاری کیلئے موزوں ترین ماحول میسر ہے۔
وزیراعلیٰ پنجاب مریم نواز سے جرمن ملٹی نیشنل کمپنی میٹرو کی سینئر وائس پریزیڈنٹ ای ون جولیٹا بولو نے ملاقات کی ، ملاقات میں میٹرو اور پنجاب حکومت کے درمیان روزگار کے مواقع پیدا کرنے کیلئے شراکت داری کے امکانات کا جائزہ لیا گیا۔
ملاقات میں پنجاب میں سرمایہ کاری اور اقتصادی ترقی کے فروغ کے امور پر گفتگو ہوئی جبکہ میٹرو کے کاروباری آپریشنز کو وسعت دینے کے ممکنہ مواقع اور باہمی ترقی و کامیابی کے لیے ممکنہ شراکت پر تبادلہ خیال کیا گیا۔
اس موقع پر گفتگو کرتے ہوئے وزیراعلیٰ پنجاب مریم نواز نے کہا کہ پنجاب میں بیرونی سرمایہ کاری اور بزنس میں توسیع پر بھرپور معاونت کی جائے گی، ذخیرہ اندوزی اور مہنگائی کے تدارک کے لئے انفورسمنٹ اتھارٹی قائم کی جا رہی ہے، پنجاب میں میٹرو کے توسیعی منصوبے سے لوگوں کے لیے ملازمتوں کے مزید مواقع پیدا ہوں گے۔
جرمن ملٹی نیشنل کمپنی میٹرو کی سینئر وائس پریزیڈنٹ ای ون جولیٹا بولو نے کہا کہ میٹرو پنجاب میں چھوٹے اور درمیانے درجے کے کاروبار کی ترقی کے مواقع فراہم کر رہا ہے، پاکستان میں میٹرو بزنس ٹو بزنس طبقے کے لیے بہت سی سروسز فراہم کرتا ہے۔
