کراچی: ( روزنامہ دنیا) سندھ ہائی کورٹ نے ووٹرز کی جانب سے تمام امیدواروں کیلیے ناپسندیدگی کے اظہار کی خاطر بیلٹ پیپر پر اضافی خانے کے لیے دائردرخواست پر الیکشن کو بدھ تک مہلت دے دی ہے۔
واضح رہے کہ الیکشن کمیشن کے لا آفیسر نے عدالت میں پیش ہو کر جواب داخل کرنے کے لیے مہلت طلب کی تھی،عدالت نے بدھ تک سماعت ملتوی کرتے ہوئے الیکشن کمیشن کے لا آفیسر کو آئندہ سماعت پر جواب لازمی داخل کرنے کی ہدایت کر دی، جسٹس محمد علی مظہر کی سر براہی میں جسٹس عمر سیال پر مشتمل 2 رکنی بینچ نے ووٹرز کی ناپسندیدگی کے اظہار کے حوالے سے بیلٹ پیپر پراضافی خانے کے لیے ڈاکٹر نتاشا مصطفٰی کی جانب سے دائر درخواست کی سماعت کی۔
درخواست گزار کے وکیل منظور کھوسو نے موقف اختیار کیا کہ بیلٹ پیپر پراضافی خانہ نان آف دی ابوو"None of the Above " شامل کیا جائے ، انہوں نے کہا کہ اس خانے کے اضافے سے سیاسی شعور پختہ ہوگا، اظہار رائے کی آزادی بامعنی ہوجائے گی اور جمہوری نظام پر عوام کے اعتماد میں اضافہ ہوگا۔
وکیل منظور کھوسو نے کہا کہ اگر کچھ ووٹرز اپنے حلقے کے تمام امیدواروں کو ناپسند کرتے ہیں تو وہ اپنی اس رائے کا کیسے اظہار کریں؟ کیونکہ اس وقت جو بیلٹ پیپر رائج ہے اس پر ایسا کوئی خانہ نہیں ہوتا ہے ، انہوں نے کہا کہ کیا ایسی صورت میں یہ ووٹرز انتخابی عمل سے لاتعلق ہو کرگھربیٹھ جائیں ، انہوں نے کہا کہ بھارت، بنگلہ دیش، یوکرین اور کینیڈا سمیت دیگر ممالک میں بیلٹ پیپر پر یہ خانہ موجود ہوتا ہے ، ووٹر اس خانے پر نشان لگاکر تمام امیدواروں کیلئے اپنی ناپسندیدگی کا اظہار کرتے ہیں۔
