اسلام آباد: (دنیا نیوز) الیکشن کمیشن نے انتخابی جلسے میں نازیبا زبان استعمال کرنے پر سابق وزیراعلیٰ خیبرپختونخوا پرویز خٹک کی کامیابی کا نوٹیفکیشن روکنے کا حکم دے دیا۔ سپیکر ایاز صادق اور مولانا فضل الرحمان کے جوابات بھی مسترد کر دیئے۔
چیف الیکشن کمشنر کی سربراہی میں چار رکنی کمیشن نے کیسز کی سماعت کی۔ سابق وزیراعلیٰ خیبرپختونخوا پرویز خٹک کے وکیل بابر اعوان پیش نہ ہوئے تاہم ان کے معاون نے جواب جمع کرایا جسے الیکشن کمیشن نے مسترد کر دیا۔
چیف الیکشن کمشنر نے ریمارکس دیئے کہ تحریک انصاف کے رہنما شرمناک کام کرنے کے بعد بابر اعوان کو آگے کیوں کر دیتے ہیں۔ الیکشن کمیشن نے جواب دوبارہ طلب کرتے ہوئے حکم دیا کہ انتخاب جیتنے کے باوجود الیکشن کمیشن کی کلیئرنس تک پرویز خٹک کی کامیابی کا نوٹیفکیشن جاری نہ کیا جائے۔
دوران سماعت چیف الیکشن کمشنر اور ممبران نے ریمارکس دیئے کہ اسپیکر قومی اسمبلی نے بادی النظر میں ضابطہ اخلاق کی خلاف ورزی کی۔ انھیں اپنے الفاظ پر ندامت ہونی چاہئے۔ لوگ جوش خطابت میں کہاں تک پہنچ جاتے ہیں۔ الیکشن کمیشن نے ایاز صادق اور مولانا فضل الرحمان سے بیان حلفی کے ساتھ جواب طلب کرتے ہوئے سماعت 9 اگست تک ملتوی کر دی۔
